Президенти Тоҷикистон бидуни он ки аз кишваре ном бибарад, аз шиддат гирифтани низоъҳо дар дунё сахт нигаронӣ кардааст.
Бино ба иттилои расмӣ, рӯзи 10-уми ноябри соли 2023 Президенти Тоҷикистон дар суханронии худ дар қисми ҳарбии 3502-и Қӯшунҳои дохилии Вазорати корҳои дохилӣ аз шиддат гирифтани ҷангу низоъҳо сахт нигаронӣ кард.
Ба қавли манбаъ, Эмомалӣ Раҳмон дар суҳбат бо милисаҳои Тоҷикистон гуфт, “имрӯз мебинем, мухолифату низоъҳои сиёсиву ҳарбӣ, диниву мазҳабӣ ва фарҳангиву тамаддунӣ ба андозае шиддат пайдо кардаанд, ки оқибати раванду ҳодисаҳои дунёро ҳатто барои чанд рӯзи оянда пешгӯӣ кардан ғайриимкон гардидааст.”
Ин нигаронии Эмомалӣ Раҳмон замоне садо медиҳад, ки аксари кишварҳои дунё дар масъалаи Фаластин, бахусус ҳамлаҳои низомии Исроил ба Навори Ғазза ва Каронаи Бохтарӣ мардум ва давлатмардони ҷаҳонро ба ду гурӯҳ тақсим кардааст. Мардум ва хеле аз давлатмардони кишварҳои исломӣ ва бархе кишварҳои ғарбӣ хостори поён додан ба ҷанг ҳастанд, аммо дар муқолиб сарони Исроилу Амрико ва бархе ҳампаймонони онҳо ҳамагуна эълони оташбасро шикасти худ унвон мекунанд.
Гуфта мешавад, Тоҷикистон борҳо мавқеи худро дар пуштибонӣ аз Фаластин эълон кардааст. Ду рӯз қабл низ вақте Иброҳим Раисӣ, Президенти Эрон ба Тоҷикистон сафар карда буд, суханронии ӯро аз тариқи Шабакаи 1 телевизиони Тоҷикистон дар хусуси мавқеи муштарак доштани ду кишвар дар масъалаи Фаластин нашр карда буд.