Вакилони Думаи давлатии Русия бо пешниҳоди лоиҳаҳои мухталиф мехоҳанд мушкилоти муҳоҷиронро зиёдтар кунанд.
Бино ба иттилои РИА Новости, Сергей Миронов, раҳбари ҳизби “Справедливая Россия — За правду” талаб кардааст, ки дар ҳолати содир шудани ҷиноят аз ҷониби муҳоҷир, бояд тамом хешовандони ӯ низ аз Русия ихроҷ карда шаванд.
Миронов бо тарҳи лоиҳае пешниҳод кардааст, ки саҳми иҷозаи кор барои муҳоҷирони кории хориҷӣ дар ҳар бахши фаъолияти иқтисодӣ аз теъдоди кулл ба 5 дарсад коҳиш дода шавад.
Дар ин лоиҳаи қонун, ҳамчунин пешниҳод шудааст, ки барои муҳоҷирон кор дар муассисаҳои тиббӣ, таксӣ, дорухона, мактабу боғчаҳо мамнуъ карда шавад. Ба қавли манбаъ ин тарҳ аллакай ба сарвазири Русия Михаил Мишустин фиристода шудааст.
Илова бар ин, лоиҳа бекор кардани тартиби бо роҳи соддашуда гирифтани иҷозаи иқомат барои оилаҳои муҳоҷир, ки муваққатан дар Русия тибқи патент кор мекунандро дар бар гирифтааст.
Дар идома Миронов талаб дорад, ки системаи патентии ба кор қабул кардани муҳоҷиронро бознигарӣ карда, мувофиқи талаботи ҷадид воридшавии оилаҳои муҳоҷирон ба кишварро манъ намоянд.
Ҳамчунин тибқи ин лоиҳа аз хориҷиёне, ки бидуни раводид ба Русия сафар мекунанл, барои ворид шудан ба хоки кишвар маблағи муайян ситонида шавад, то ин маблағ дертар барои ихроҷи муҳоҷирони қонунвайронкун сарф карда шавад.
Гуфта мешавад, дар сурати ихроҷи муҳоҷирон аз системаи тандурустӣ ин эҳтимол вуҷуд дорад, ки дар баъзе минтақаҳои Русия бо сабаби зиёд вудани коргарони соҳаи тандурустӣ аз ҳисоби муҳоҷирон ин система фалаҷ хоҳад шуд.
