Вазорати нақлиёти Тоҷикистон хабар додааст, ки тамоми ширкатҳое, ки дар пойтахт ба хидматрасонии таксӣ машғул ҳастанд, бояд ба мошинҳои барқӣ гузаранд.
Душанбеи 13-уми январи соли 2025, Вазорати нақлиёти кишвар иттилоъ додааст, ки “то 1 сентябри соли 2025 ҳамаи ширкатҳое, ки дар Душанбе мусофиронро интиқол медиҳанд, бояд ба системаи нақлиёти барқӣ гузаранд.”
Ин иқдом дар доираи “Барномаи рушди нақлиёти барқӣ дар Ҷумҳурии Тоҷикистон барои солҳои 2023-2028” анҷом мешавад. Инчунин дар Тоҷикистон “Стратегияи рушди иқтисоди сабз барои солҳои 2023-2028” низ қабул шудааст.
Ба гуфтаи бархе коршиносон, ҳар чанд Тоҷикистон бо суръат аз Чин ва дигар кишварҳо ба ворид кардани мошинҳои барқӣ рӯй овардааст, ин иқдом аз як сӯ бозори мошинҳои маъмулӣ, ки бо сӯзишворӣ ҳарат мекунанд, тангтар карда бошад, аз сӯи дигар зиёд шудани чунин мошинҳои барқӣ вобастагии Тоҷикистонро ба Русия ва дигар кишварҳо дар хариди сӯзишворӣ камтар мекунад.
Гуфта мешавад, дар ҳоли ҳозир ҳудуди 36 ҳазор мошинҳои барқӣ расман ба қайд гирифта шудааст. Барои афзоиши ворид кардани нақлиёти барқӣ соли 2022 ба Кодекси андози Ҷумҳурии Тоҷикистон тағйирот ворид гардида буд. Бар асоси ин тағйирот тайи солҳои 2022-2032 воридоти нақлиёти барқӣ бидуни боҷи гумрукӣ анҷом шуда, инчунин воридкунандаҳо аз пардохтҳои андоз ва аксизҳо озод мебошанд.
