Хабар ИҚТИСОД

“Юнистрим” таҳрим шуд: пули муҳоҷирон чӣ мешавад?

Иттиҳоди Аврупо бонки русии “Юнистрим”-ро, ки тавассути низоми ҳамноми он ба Тоҷикистон пул интиқол дода мешавад, ба рӯйхати таҳримҳо ворид кард.

“Юнистрим” таҳрим шуд: пули муҳоҷирон чӣ мешавад? Акс сохтаи ҳуши маснуӣ аст

Иттиҳоди Аврупо бонки русии “Юнистрим”-ро, ки тавассути низоми ҳамноми он ба Тоҷикистон пул интиқол дода мешавад, ба рӯйхати таҳримҳо ворид кард.

Маҳдудиятҳои нав метавонанд кори бонк бо шарикони хориҷиро мушкил кунанд, аммо то 17-уми ноябр тасдиқи расмии қатъи интиқолҳо ба Тоҷикистон пайдо нашуд.

Бино ба баёнияи Шӯрои Иттиҳоди Аврупо, рӯзи 16-уми ноябри соли 2026 нисбат ба 12 шахс ва 101 ширкату муассиса маҳдудиятҳои иловагӣ ҷорӣ шудааст. Дар миёни онҳо наздик ба 50 бонк ва муассисаи молии Русия ҳастанд. Ҳадафи эълоншудаи ин чораҳо маҳдуд кардани имкониятҳои Русия барои маблағгузории ҷанг алайҳи Украина мебошад.

Шӯрои Иттиҳоди Аврупо дар шарҳи тасмим гуфтааст, ки ин бонк ба низомиёни Русия, аз ҷумла иштирокдорони ҷанг дар Украина, барои бозпардохти қарз муҳлати имтиёзнок медиҳад. Иттиҳод ин амалро иҷрои сиёсати ҳукумати Русия арзёбӣ кардааст.

Ба гуфтаи коршиносон, таҳримҳо яхбандии дороиҳои бонкро дар доираи салоҳияти Иттиҳоди Аврупо ва манъи мустақим ё ғайримустақим дар ихтиёри он гузоштани маблағу захираҳои иқтисодиро пешбинӣ мекунанд. Аз ин рӯ, амалиёте, ки ба бонкҳо ва дигар муассисаҳои тобеи қоидаҳои Иттиҳоди Аврупо вобастаанд, бо маҳдудият рӯбарӯ мешаванд.

Ҳамчунин гуфта мешавад, ки ворид шудани “Юнистрим” ба рӯйхати таҳримҳо ба таври худкор тамоми интиқолҳо миёни Русия ва Тоҷикистонро қатъ намекунад. Балки паёмади амалии он ба роҳҳои ҳисоббаробаркунӣ ва тасмими бонкҳои шарик вобаста хоҳад буд. Дар сурати маҳдуд шудани ҳамкорӣ, эҳтимол дорад муштариён бо таъхири гирифтани пул, кам шудани нуқтаҳои пардохт ё зарурати интихоби низоми дигар рӯбарӯ шаванд.

Ба гуфтаи таҳлилгарон, ба сабаби вобастагии иқтисоди кишвар ба пули муҳоҷирон ин масъала барои хонаводаҳои тоҷик бетаръсир намемонад. Бонки ҷаҳонӣ дар шарҳи вазъи Тоҷикистон таъкид карда буд, ки интиқолҳои пулӣ хароҷоти хонаводаҳо ва маблағгузории воридотро дастгирӣ мекунанд. Ба арзёбии ин ниҳод, вобастагӣ ба чунин маблағҳо иқтисоди Тоҷикистонро дар баробари тағйироти берунӣ осебпазир нигоҳ медорад.

Барои муҳоҷире, ки қисми маошашро ба Тоҷикистон мефиристад, мушкили интиқол метавонад ба дер расидани маблағи рӯзгор ба хонаводааш оварда расонад. Агар ӯ маҷбур шавад аз низоми дигар истифода кунад, ҳаққи хидмат ва қурби табдили асъор низ метавонанд фарқ кунанд.

То замони омода шудани ин хабар, эълони расмие аз ҷониби Бонки миллии Тоҷикистон ё “Юнистрим” дар бораи қатъи интиқолҳо ба Тоҷикистон бар асари таҳримҳои нави аврупоӣ дар манбаъҳои дастрас пайдо нашуд. Барои муштариён ҳоло муҳим аст, ки пеш аз фиристодани пул имкони гирифтани онро дар бонки қабулкунанда, асъори пардохт ва ҳаққи хидмат мушаххас кунанд.

Мавзӯъҳои марбут