Нашрияи “Providence” 22-уми январи соли ҷорӣ дар истинод ба созмони хайриявии “Рейнджерҳои Озоди Бирма” (FBR) аз фишор болои масеҳиён дар Тоҷикистон хабар дод.
Созмони хайриявӣ ва динии “Рейнджерҳои Озоди Бирма” (FBR) гузориши худро дар мавриди фишорҳои идомадори масеҳиён аз ҷониби мақомоти Тоҷикистон аз забони як масеҳии тоҷик, ки ҳуввияти худро фош накардааст, омода сохтааст.
Ин шахс, ки номи мустаори худро Ричард Паттерсон гузоштааст, ишора карда, ки бар хилофи қонунҳои асосии кишвар, ақаллиятҳои динӣ ва дар кул диндорон мавриди озору азият қарор мегиранд.
Ба гуфтаи коршиносон, Сарқонуни Тоҷикистон тибқи моддаи 26 озодии диниро барои ҳама кафолат додааст, аммо дар амал маҳдудиятҳои ҷиддӣ бар зидди тамоми диндорон ҷорӣ карда мешавад.
“Аз ҷумлаи ин маҳдудиятҳо манъ кардани таблиғоти динӣ, нагузоштан барои ташкили ҷамъомадҳо барои ибодат ва ҳамчунин манъи иштироки кӯдакон дар маросимҳои диниро дар бар мегирад”, – мегӯяд Паттерсон.
Мусоҳиби FBR изҳор дошта, ки ба хотири иштироки кӯдакони масеҳӣ дар маросимҳои калисоҳо, ин калисоҳо аз тарафи ҳукмат ҷарима шуданд. Патерсон афзудааст, дар Тоҷикистон онҳое, ки фаъолияти динӣ мекунанд, мумкин аст равонаи зиндон шаванд.
Ба гуфтаи ӯ, Баҳром ном як масеҳии дигар ба хотири пайдо шудани 20 китоби Муқаддас дар манзилаш ба муддати 8 сол равонаи зиндон шуд.
Таҳлилгарон мегӯянд, дар Тоҷикистони зери раҳбарии президенти худкома Эмомалӣ Раҳмон, ки аз соли 1992 то ҳол дар сари қудрат аст, фазои буғранҷи ғайридемократӣ дар байни қишрҳои ҷомеа ҳукумафармост. Бо вуҷуди ин ки Тоҷикистон расман, рӯи коғазҳо як давлати демократӣ аст, вале озодии дин дар он вуҷуд надорад.
Гузоришгарони байналмилалӣ Тоҷикистонро яке аз кишварҳои диктотурӣ ва зиддидинӣ арзёбӣ мекунанд, ки дар он озодиҳои динӣ ва мазҳабӣ ба куллӣ маҳдуд карда мешавад ва солона садҳо шаҳрванд бо сабаби диндор будан бо иттиҳоми “ифротгароӣ” равонаи зиндон мешаванд.
