Ширкати “Барқи тоҷик” дар ҳамроҳӣ бо Вазорати энергетика ва захираҳои оби ҷумҳурӣ, тарҳи боло бурдани нархи барқро ба Ҳукумат пешниҳод кардаанд.
Сафаралӣ Қурбонзода, муовини аввали Агентии омор ва Хадамоти зиддиинҳисорӣ, дар як нишасти хабарӣ рӯзи 5-уми феврал гуфт, имсол нархи нерӯи барқ мумкин аст афзойиш ёбад.
Ӯ дар ин нишаст инчунин гуфт, ки “Тамоми тавофуқномаҳо ва санадҳои баррасӣ ва тасвибшуда тавассути созмонҳои махсус муайян мекунанд, ки боло бурдани солонаи нархи барқ лозим аст.”
Тибқи гузоришҳо, Агентии омор ва Хадамоти зиддиинҳисорӣ ин масъаларо барррасӣ карда ва ба мақомоти марбута пешниҳодоти худро мабнӣ бар боло бурдани арзиши таърифаҳои барқ фиристодааст.
Ҳамин тавр мактуби мушобеҳе дар мавриди ниёзи боло бурдани арзиши барқ аз ҷониби Вазорати энергетика ва захираҳои об ба Ҳукумат фиристода шудааст. Тибқи қонунгузории амалкунанда, таърифаҳои нерӯи барқ аз ҷониби Ҳукумати кишвар тасдиқ мешавад.
“Ҳоло қарори дахлдоре ба тасвиб нарасидааст. Ва маълум нест, ки арзиши нерӯи барқ чӣ қадар боло меравад. Ин танҳо пас аз ҳисоб кардани ҳазинаҳои тавлид, интиқол ва тақсими барқ пурра маълум мешавад.”- мегуяд Сафаралӣ Қурбонзода.
Дар ҳоли ҳозир арзиши миёнаи таърифаҳои нерӯи барқ дар кишвар 35 дирҳам барои 1 кВт/соат аст. Дар соли 2021 нарх 20.11 дирҳам буд.
Ин ҳам дар ҳолест, ки тағйир дар нархи барқ бори охир аз 1-уми январи соли 2024 сурат гирифта, 16% афзоиш ёфта буд. Арзиши тарифҳои барқ барои аҳоли дар соли 2024 аз 26.51 дирам барои 1 кВт/соат то 30.75 дирам боло рафт.
