Мақомоти Вазорати корҳои дохилии шаҳри Душанбе алайҳи панҷ гӯштфурӯш барои гаронфурӯшӣ парвандаи маъмурӣ боз кардааст.
Ба иттилои Раёсати ВКД, “фурӯшандаҳо бо мақсади манфиатҷӯӣ нархи гӯштро аз нархи муқаррарӣ баланд бардоштанд.” Мақомот номи ин панҷ гӯштфурӯшро нашр карда, аз онҳо Зокиров Хайриддин, Диллоев Меҳроб, Ҳоҷиев Шамсиддин, Файзуллоев Бурҳониддин ва Олимзода Бузургмеҳр ёд бурдааст.
Тавре ин ниҳод хабар дод, гӯштфурӯшон барои ин амалашон ҷарима шуданд. Ва гуфта мешавад, қонун барои соҳибкороне, ки нархи маҳсулотро худсарона боло мебаранд, аз 1500 то 6000 сомонӣ ҷарима пешбинӣ кардааст. Аммо гуфта нашудааст, ки ин гуштфурӯшон ҳар кадом чӣ миқдорӣ ҷарима шудаанд.
Раёсати ВКД қаблан аз соҳибкорон хоста буд, ки дар моҳи Рамазон нархи молу маҳсулотро боло набаранд.
Гаронфурӯшӣ дар бозорҳои Тоҷикистон ҳамасола ҳангоми фарорасии моҳи Рамазон ва ё пеш аз иду ҷашнҳо ба як одати маъмулӣ байни савдогарон табдил ёфтааст. Сокинон аз он шикоят мекунанд, ки моҳи Рамазон, ки моҳи хайру баракат аст ва мардуми мусалмони Тоҷикистон ҳама рӯзадоранд, мебояд нархи маҳсулот дар бозорҳо арзонтар бошад, аммо дар бозорҳои кишвар баракс аст, ки аксари мардум тавони хариди, бахусус гӯштро надоранд.
