Мақомот дар ноҳияи Рашт ба масъулини як мактаби хурде, ки пас аз заминларза дар ҳолати садавамӣ қарор дорад, гуфтаанд, то деворҳояш фурӯ нарезад, онро таъмир намекунанд.
Чанд рӯз пеш, рӯзноманигори собиқи телевизиони давлатии “Сафина” Орзу Исоев дар як навори видеоӣ, ки дар канали YouTube-и худ нашр кард, аз вазъи хатарноки мактаби рақами 110 дар деҳаи Ҳулаки ҷамоати Ҳиҷбораки ноҳияи Рашт хабар дод. Навор, ки баъди заминларзаи шадид дар ноҳияи Рашт омода шудааст, аз зарари сахти биноҳо, ки баъзе дар ҳолати хатарнок қарор доранд, қисса мекунад.
Орзу Исоев дар навори худ мегӯяд, дар ин мактаб зиёда аз 40 талаба таҳсил мекунад ва бинои мактаб дар ҳолати садамавӣ қарор дорад. Бо вуҷуди ин, комиссияи ҳукуматӣ ин мактабро ба рӯйхати биноҳои садамавӣ ворид накардааст.
Як сокини деҳа дар навор мегӯяд: “Комиссияе, ки аз тарафи ҳукумати ноҳия ташкил шуда буд, ин мактаби ибтидоиро дида, гуфтанд, то агар девор чаппа шудагӣ набошад, муассисаро мо таъмир намекунем.” Ӯ таъкид мекунад, ки мактаб дар ҳолати садамавӣ қарор дорад ва таҳсил кардан дар он хатарнок аст.
Як рӯз баъд аз пахши ин видео, ки аз вазъи хатаноки мактаб хабар медод, Маркази матбуоти Вазорати маориф ва илми Тоҷикистон вокуниш нишон дода, Орзу Исоевро ба “дурӯғгӯӣ ва иғвогарӣ” айбдор кард. Вазорати маориф ва илм менависад: “Рӯзноманигор боғаразона сохтмони синфхонаҳои иловагиро дар шафати муассиса нодида гирифта, вобаста ба ин дар навор ҳарфе намегӯяд.”
Орзу Исоев то баҳол ба ин суханони Вазорати маориф ва илми кишвар ҷизе нагуфтааст.
Ба иттилои вазорат, муовини вазир Бадриддин Музаффарзода рӯзи 6-уми май аз ин мактаб дидан кардааст. Вазорат иддао мекунад, ки дар мактаб на 40, балки 21 хонанда дар ду баст таҳсил мекунанд.
Ба гуфтаи ин ниҳод, сохтмони синфхонаҳои иловагӣ барои 21 хонанда бо дастгирии Вазорати маориф ва бо ҳашари сокинон аз соли 2023 оғоз шудааст ва то ҳол идома дорад.
Аммо дар аксҳое, ки худи Вазорати маориф ва илм аз ин сохтмон нашр кардааст, дида мешавад, ки раванди сохтмон қатъ шудааст, дохили бино алаф сабзида ва ҳеҷ коргари сохтмонӣ дида намешавад. Аз соли 2023 то имрӯз, ҳатто 50 дарсади сохтмони синфхонаҳо барои 21 хонада, ки як мактаби хело хурд ба ҳисоб меравад, ба анҷом нарасидааст.
