Корбарон дар шабакаҳои иҷтимоӣ аз он шикоят мекунанд, як мубаллиғ ва ҳимоятгари ҳукумати Эмомалӣ Раҳмон бо номи Оятуллоҳ Гилаев онҳоро фиреб дода, маблағҳояшонро гирифтааст.
Гилаев, яке аз собиқ мухолифони ҳукумати Эмомалӣ Раҳмон, ки пас аз бозгашт ба Тоҷикистон ба ҳомиёни сарсахти ин ҳукумат табдил ёфта буд ва мухолифонро бо лафзҳои қабеҳ танқид мекард, муддати тӯлонӣ аз фазои маҷозӣ дур буд ва хабари наве аз ӯ нашр намешуд.
Чанде пеш дар шабакаҳои иҷтимоӣ наворҳое паҳн шуданд, ки зоҳиран ӯро дар яке аз кишварҳои арабӣ нишон медиҳанд. Дар ин наворҳо Гилаев бо либоси арабӣ ва риши баланд ба назар мерасад. Бархе корбарон ӯро ба қаллобӣ муттаҳам мекунанд.
Дар наворҳои паҳншуда, Оятулло Гилаев ба аз худ кардани 18 ҳазор доллар ва ҳамчунин ба фиреби зиёда аз 700 нафар муттаҳам мешавад. Худи Гиляев дар посух ба ин суханҳо мегӯяд, ки назди пулис рафта гап мезанем.
Дар як навори дигар ӯ дар болои тахти хоб дар назди як зан сабт шудааст, ки вокунишҳои гуногунро дар миёни ҷомеа ба вуҷуд овардааст.
Як корбар шикоят карда мегӯяд, ки Оятулло Гилаев роҳбари ширкати бо номи “Haj-аl-Masakin” буда, мардумро аз Душанбе ба зиёрати Умра мебарад. Ба гуфтаи ӯ, Гилаев дар Макка аз номи ислом истифода бурда, дар бораи зани дуюм гирифтан ҳарф мезанад ва духтарони бешавҳарро никоҳ мекунад. Сипас то анҷоми сафари Умра аз онҳо истифода бурда, баъд аз фиристодан талоқ медиҳад.
Худи Гилаев то кунун дар бораи ин тасвирҳо ва наворҳо шарҳе надодааст ва назараш маълум нест. Ва ҳамчунин маълум нест, ки ин наворҳо кай ва дар чӣ замоне гирифта шудаанд.
Azda TV омодааст назари худи Оятуллоҳ Гилаевро дар ин маврид нашр кунад. Ва ҳамчунин шаҳрвандоне, ки дар ин бора маълумоти дақиқ доранд ва ё ҷабрдида ҳастанд ва мехоҳанд онро нашр кунанд, метавонанд ба унвонии мо маълумоти худро бифиристанд.
