Бо гузашти ду рӯз аз ҳодисаи қатли бераҳмонаи Қобилҷони 10-сола дар яке аз мактабҳои Русия, вазири маорифи Тоҷикистон Раҳим Саидзода ба ҳамтои русаш Сергей Сергеевич нома навиштааст.
Дар ин нома, ки 18-уми декабр навишта шудааст, Саидзода аз Русия хостааст, ки барои таъмини амният ва ҳифзи ҳуқуқи хонандагон дар муассисаҳои таълимӣ, новобаста аз мансубияти миллӣ ва шаҳрвандӣ чораҳои бештар андешанд.
Вазири маориф ва илми кишвар дар номааш таъкид кардааст, ки содир гардидани чунин ҷинояти ниҳоят мудҳиш дар мактаб боис ба норозигӣ ва ташвиши амиқ гардида, метавонад ба ҳолати иҷтимоии кӯдакон, волидон ва омӯзгорон таъсири бад расонда, он аз ҷониби гурӯҳҳои ифротгаро ва миллатгарои радикалӣ бо мақсади тарғиб ва таҳрики содир намудани ҷиноятҳои нав истифода гардад.
Дар охир Вазорати маорифи кишвар аз Вазорати маорифи Русия хоҳиш намудааст, ки тафтишоти пурра, ҳамаҷониба ва беғаразонаи ин ҳодиса дар ҳамкорӣ бо мақомоти салоҳиятдори Федератсияи Русия таъмин гардида, чораҳои зарурӣ барои ошкор намудани сабабҳо ва омилҳои мусоидаткунандаи содиршавии ҷиноят андешида шаванд.
Бояд гуфт, ин ягона вазир ё ниҳоди давлатие нест, ки пас аз кушта шудани Қобилҷон дар ин бора суҳбат мекунанд.
Пештар Вазорати корҳои хориҷии Тоҷикистон бо пахши изҳороте заминаи кушторро “бегонаситезӣ” номида, гуфт, дар пайванд ба ҳодиса сафири Русияро дар Душанбе даъват кард ва ба ӯ “нота” бо талаби фавран, воқеъбинона ва беғаразона гузаронидани тафтишоти ин ҳодисаи фоҷеабор ва ба ҷавобгарии қатъӣ кашидани гунаҳкорон, супурд.
Ҳамчунин Юсуф Раҳмон, дабири Шӯрои амният, Умед Бобозода, омбудсмен ва Рамазон Раҳимзода, вазири корҳои дохилии кишвар бо ҳамтоёни русашон мулоқот карда, ин ҳамларо, ки дар заминаи бегонаситезӣ дар Маскав сурат гирифтааст, маҳкум кардаанд ва аз мақомоти Русия хостаанд ин ҳодиса одилона ва ҳаматарафа таҳқиқ шавад. Аммо раисҷумҳури Тоҷикистон ва ё дастгоҳи ӯ дар ин бора вокунише накардаанд.
Бо вуҷуди ин фаъолони тоҷик мегӯянд, ки суҳбат бо мақомдорони рус ва супоридани нота нокифоя буда, мақомоти Тоҷикистон бояд амалҳои ҷиддитареро барои такрор нашудани чунин ҳодисаҳо, ба мисли бозхондани сафири Тоҷикистон аз Русия ва рондани сафири Русия аз кишвар ва бастани пойгоҳи низомии 201-уми Русия дар Тоҷикистон, анҷом диҳанд.
Ёдовар мешавем, ки субҳи 16-уми декабр, хонандаи синфи 9 бо номи Тимофей ба мактабаш дар шаҳраки Горки-2-и ноҳияи Одинсовои вилояти Маскав дар тан ҷавшан (бронежилет) ва бо корд ҳамла карда, чанд нафарро теғ мезанад. Дар натиҷаи ин ҳамлаи террористӣ хонандаи синфи 4-и ин мактаб Қобилҷони Алиев дар ҷойи ҳодиса бар асари захмҳои амиқ ҷон медиҳад ва посбони ин мактаб захмӣ мешавад.
Ин ҳамлавар, ки пайрави нажодпарастон буда, марги мусулмонон, яҳудиён, зиддифашистон ва либералҳоро шиори худ медонист аз ҷониби пулис боздошт ва барои ду моҳ ба ҳабси пешакӣ гирифта шудааст, ҳамзамон ӯ тасдиқ кардааст, ки ба ин ҳамла аз пеш омодагӣ медид.
Ин ҳодиса, ки ҳатто дар раонаҳои ҷаҳонӣ пахшу нашр гардид вокунишҳои густурдаеро дар шабакаҳои иҷтимоӣ ва миёни ҷомеаи Тоҷикистон ва ҳатто хориҷиён ба миён оварда, варзишгарону блогерони шинохтае мисли Ҳабиб Нурмагамедов, Магомед Исмаилов, Асҳаб Тамаев, Артем Карокоз (Каха) ва садҳои чеҳраҳои шинохтаи дигар онро маҳкум кардаанд.
Мухолифон ҳам дар хориҷ аз кишвар кушта шудани хонандаи даҳсолаи тоҷикро дар Русия маҳкум карда, дар ин ҳодиса ҳукумати Тоҷикистон ва Русияро муқассир хондаанд.
