Раисҷумҳури Русия Владимир Путин ба президенти Тоҷикистон Эмомалӣ Раҳмон дар робита ба қатли бераҳмонаи навраси 10-солаи тоҷик дар яке аз мактабҳои вилояти Москва изҳори тасаллият намуд.
Путин ин суханҳоро 22-уми декабри соли ҷорӣ, дар ҳошияи вохӯрии ғайрирасмии раҳбарони кишварҳои ИДМ дар шаҳри Санкт-Петербург баён карда, гуфтааст, ки “мехостам мулоқоти дуҷонибаи моро бо суханони тасаллияти самимӣ ҳам ба Шумо ва ҳам ба оилаи писарбачаи аз Тоҷикистон, ки чанд рӯз пеш ба ҳалокат расид, оғоз намоям“.
Ӯ таъкид кард, ки тафтиши ин фоҷиа ҳамаҷониба ва беғаразона анҷом дода шуда, мақомоти ҳифзи ҳуқуқи Русия ҳамкорони тоҷикистонии худро аз раванди тафтишот мунтазам огоҳ хоҳанд кард.
Путин ҳамчунин ба Раҳмонов гуфта, ки “содир кардани амалҳои террористӣ нисбат ба кӯдакон ҷинояти ниҳоят нафратангез аст. Гунаҳкорон, агар шумораашон бештар бошад, ба пуррагӣ ҷазо хоҳанд гирифт. Ин ҷиноят маро сахт такон дод. Лутфан, тасаллияти маро ба хонаводаи писарбачаи ҳалокшуда расонед“.
Суханҳои раисҷумҳури худкомаи Тоҷикистон Эмомалӣ Раҳмон дар ин бора дастраси расонаҳо нашудааст.
То ҳанӯз Эмомалӣ Раҳмон ба шакли ҷудогона ва ё дар рафти суханрониҳояш, ки дар расонаҳои давалтӣ нашр шудаанд, дар мавриди қатли ин кӯдаки бегуноҳ изҳори назар накардааст ва ҳатто ба хонаводаи ӯ ҳамдардӣ баён накардааст.
