Думаи давлатии Русия қонуни наверо баррасӣ мекунад, ки шароити будубош талаботи иловагиро нисбат ба муҳоҷирони корӣ пешбинӣ мекунад.
Гуфта мешавад, раиси Думаи давлатӣ Вячеслав Володин тарҳи тағйирот ба қонуни федералии “Дар бораи вазъи ҳуқуқии шаҳрвандони хориҷӣ дар Федератсияи Русия”-ро барои баррасӣ пешниҳод кардааст.
Ин лоиҳа ба Кумитаи корҳои Иттиҳоди Давлатҳои Мустақил, ҳамгироии авруосиёӣ ва робита бо ҳамватанони Думаи давлатӣ ирсол гардида, Володин дар шарҳи он гуфтааст, ки такмили сиёсати муҳоҷират яке аз масъалаҳои калидӣ дар рӯзномаи парлумон боқӣ мемонад.
Тибқи ин тарҳи қонун, муҳоҷирони корӣ бояд андозро дар шакли пардохти пешакӣ на танҳо барои худ, балки барои ҳамаи аъзои оилаашон, ки дар Русия таҳти таъминоташ қарор доранд, пардохт намоянд.
Ҳамзамон, муҳлати будубоши муҳоҷир ва аъзои оилаи ӯ дар қаламрави Русия ба муҳлати кории ӯ вобаста хоҳад буд.
Ҳамчунин лоиҳаи қонун пешбинӣ мекунад, ки фарзандони шаҳрвандони хориҷӣ, ки ба синни 18 расидаанд, дар сурати надоштани дигар асосҳои қонунии иқомат, бояд дар давоми 30 рӯз қаламрави Русияро тарк намоянд, новобаста аз он ки волидонашон кор мекунанд ё не.
Илова бар ин, пешниҳод шудааст, ки патент ё иҷозатномаи кор барои шаҳрванди хориҷӣ дар ҳолати набудани маълумот дар бораи даромади ӯ ё агар даромад аз ҳадди ақали зиндагӣ бо дарназардошти коэффисиенти минтақавӣ барои худи муҳоҷир ва ҳар як узви оилааш камтар бошад, бекор карда шавад.
Тибқи ин тағйирот агар муҳоҷир дар давоми як соли навбатӣ камтар аз даҳ моҳ фаъолияти шуғлӣ дошта бошад, ба ӯ иҷозати иқомати муваққатӣ ва иҷозати иқомати доимӣ дода намешавад ва ё иҷозаи мавҷуда бекор карда мешавад.
Ба гуфтаи Володин, иқтисоди Русия ҳавасманд нест, ки муҳоҷирони корӣ аз кумакҳои иҷтимоӣ вобаста бошанд. Ӯ таъкид кард, ки сатҳи даромад ва таъминоти муҳоҷирон бояд ба ҳаҷми хизматрасониҳо ва имкониятҳое, ки дар кишвар аз онҳо истифода мебаранд, мувофиқат кунад.
Раиси Думаи давлатӣ мегӯяд, тадбирҳои пешниҳодшуда имкон медиҳанд назорат аз болои даромади шаҳрвандони хориҷӣ ва қонуниятии будубоши онҳо пурзӯр гардида, инчунин сарборӣ ба инфрасохтори иҷтимоӣ коҳиш дода шавад.
