Рӯзи гузашта дар пайи як ҳодисаи нохуши бархурди мошинҳо дар роҳи Душанбе-Хуҷанд 5 нафар аъзои ду хонавода ҷон бохтанд.
Бино ба иттилои Вазорати корҳои дохилии Тоҷикистон (ВКД), 24-уми феврали соли 2026, як мошини сабукрави навъи “TAЙОТА Carola VERSO”, зери идораи Шоҳназаров Мастибеки 38-сола сокини ноҳияи Айнӣ, аз вилояти Суғд ба самти шаҳри Душанбе ҳаракат мекард, ӯ дар ҳудуди ноҳияи Варзоб аз идораи мошин набаромада, ба муқобили самти ҳаракати роҳ баромада ба мошини боркаши “ВОЛВО Truck”, зери идораи Атобулоев Зикруллои 49-сола сокини ноҳияи Масчоҳ бархурдааст.
Дар натиҷа 5 нафар сарнишинони худрави “Carola VERSO” дар пайи ин садама дар ҷои ҳодиса ҷони худро аз даст доданд. Гуфта мешавад, ҳодисаи маргбор рӯзи 24-уми феврал тахминан соати 15:30 рух додааст.
Дар ҳамин ҳол Вазорати корҳои дохилӣ номи қурбониёни ин садамаи мудҳишро нашр кардааст, ки инҳоянд:
Шоҳназаров Мастибеки 38-сола, ронандаи “Carola VERSO”;
Шоҳназаров Завқибеки 46-сола;
Ашуров Раҳмоназири 52-сола;
Ашурова Садбарг 46-сола;
Ашурова Меҳрубон 47-сола.
Вазорати корҳои дохилӣ дар иттилоияи худ мегӯяд, ҳамаи ҳалокшудагон сокинони ноҳияи Айнии вилояти Суғд будаанд. Ва зоҳиран се нафар узви як хонавода ва ду нафари дигар узви як хонаводаи дигар будаанд.
