Мақомоти Русия ба садҳо муҳоҷири тоҷик дар фурудгоҳи Жуковский иҷозаи вуруд ба Маскавро надоданд.
Як муҳоҷири тоҷик рӯзи чоршанбе ба Azda.tv хабар дод, ки рӯзи 1-уми март тавассути ҳавопаймои ширкати “Уральские авиалинии” аз Душанбе ба Маскав парвоз кардааст, аммо дар фурудгоҳи Жуковский ба ӯ ва ҳудуди 60 зодаи дигари Тоҷикистон иҷозаи ворид шудан ба Маскавро надодаанд.
Ба гуфтаи ин муҳоҷир, худи ҳамон рӯз 50 муҳоҷири дигари тоҷик низ, ки бо ҳавопаймои шикарти “Somon Air” ба Русия омада буданд, бо ин ҳолат рӯ ба рӯ шудаанд.
Ҳамсуҳбати Azda.tv мегӯяд, ки дар фурудгоҳ шаҳрвандони дигари Тоҷикистон низ ҳузур доштанд, ки қаблан боздошт шудаанд. Баъзе аз онҳо билети бозгаштро мустақилона харидорӣ карда буданд, аммо, ба гуфтаи ӯ, ба онҳо иттилоъ дода шудааст, ки фиристодани онҳо аз ҷониби ниҳодҳои марбута ташкил карда мешавад ва бинобар ин билетҳои харидашудаи онҳа ба қавле сӯхтааст.
Қисме аз шаҳрвандон аз як то ду рӯз дар минтақаи транзитии фурудгоҳ нигоҳ дошта шуда, баъдан бо парвозҳои бозгашт ба Тоҷикистон фиристода шудаанд.
Мақомоти Русия сабаби роҳ надодани муҳоҷирони тоҷикро ба Маскав нагуфтаанд, аммо телефонҳои онҳоро гирифта, мавриди санҷиш қарор додаанд.
Зимни санҷишҳо, ба гуфтаи манбаъ, ба муҳоҷирон саволҳое дода мешуданд, ки, ба назари онҳо, ба ҳадафи сафар иртиботи мустақим надоштанд. Аз ҷумла, аз онҳо пурсида мешуд, ки чаро паёмрасони WhatsApp кор намекунад, чаро телефони нав доранд ва чаро дар YouTube дар бораи ҷанги Русия ва Украина тамошо намекунанд.
Ин ҳам дар ҳолест, ки “YouTube” ва паёмрасони “WhatsApp” дар Русия маҳдуд карда шудаанд.
Манбаъ таъкид мекунад, ки ба мушоҳидаи ӯ чунин тадбирҳо маҳз нисбат ба шаҳрвандони Тоҷикистон татбиқ мешуданд. Вале зодагони Узбекикстон ё дигар кишварҳо бидуни тафтиши иловагӣ ба хоки Русия роҳ дода мешуданд.
То ҳол сабаби асосии роҳ надодани зодагони Тоҷикистон ба Русия маълум нест. Аммо пас аз ҳодисаи хунини “Крокус”, ки гумонбаронаш зодагони Тоҷикистон гуфта мешаванд, вазъи муҳоҷирони кишвар дар Русия душвор шудааст.
