Раисҷумҳури Амрико, Доналд Трамп 30-юми март бо нашри паёме дар шабакаи Truth Social таҳдид кард, ки агар ба зудӣ бо Эрон ба созиш нарасад, тамоми зерсохторҳои энержӣ ва чоҳҳои нефти ин кишварро нобуд мекунад.
Трамп зимни матлаби таҳдидомезаш ҳамзамон аз гуфтушунидҳои ҷиддӣ бо ҳукумати Эрон хабар дод ва афзуд, ки дар ин самт “пешрафти калон” ба даст омадааст. Ӯ гуфт: “Иёлоти Муттаҳидаи Амрико бо ҳукумати НАВ ва АҚЛОНИТАР дар Эрон гуфтушунидҳои ҷиддӣ дорад, то амалиёти низомии худро дар Эрон қатъ кунад.”
Трамп таъкид кард, агарчи дар раванди музокироти пешравиҳое ҳаст, вале дар сурати ба зудӣ ба созиши ҷиддӣ нарасидан ва фавран боз нашудани тангаи Ҳормуз “барои тиҷорат”, нерӯҳои амрикоӣ бар иловаи зерсохторҳои энержӣ ва чоҳҳои нефтӣ инчунин ҷазираи Харк (маркази асосии содироти нефти Эрон) ва ҳатто полоишгоҳҳои обтозакуниро “комилан” нобуд мекунад.
Трамп ин амалро “хотимаи зебои меҳмонии мо дар Эрон” номид ва иддао кард, ки инҳо ҳадафҳое ҳастанд, ки то ҳол мавриди ҳамла қарор нагирифтаанд. Ӯ инро “интиқом барои сарбозони амрикоие, ки дар тӯли 47 соли гузашта аз ҷониби ҳукуматдорони Эрон кушта шудаанд”, арзёбӣ кард.
Ин таҳдиди Трамп дар ҳолест, ки ҷанги Амрико ва Исроил алайҳи Эрон 28-ми феврал оғоз шуд ва инак беш аз як моҳ мешавад, ки идома дорад. Ва ҳоло тангаи Ҳормуз – роҳи асосии баҳрӣ, ки наздики 20% нефти ҷаҳон аз он ҷо убур мекунад, аз ҷониби Эрон баста мондааст.
Трамп дар аввал барои ҳамла кардан ба зерсохторҳои муҳими Эрон ба хотири боз кардани тангаи Ҳурмуз 48 соат муҳлат дода буд, аммо ин муҳлатро то 5 рӯзи дигар тамдид кард ва ахиран боз то 10 рӯз (6-уми апрел) ин муҳлатро дароз кард.
Трамп иддао дорад, ки ИМА қариб ба тамоми аҳдофаш дар Эрон расидааст ва аллакай “тағйири режими” дар ин кишвар бо кушта шудани роҳбарони калидӣ, аз ҷумла Оятуллоҳ Хоманаӣ амалан сурат гирифтааст ва ҳоло бо “ҳукумати нав” сарукор дорад.
Ин ҳам дар ҳолест, ки Ҷумҳурӣ исломии Эрон борҳо дар посух ба навиштаҳои Трамп дар бораи дастовардҳои гуфтушунидҳо вокуниш карда, вуҷуди гуфтушунидҳо ва ё пешрафте дар ин самтро рад кардааст. Ва ҳоло коршиносон тахмин мезананд, ки аз навиштаи ахири Трамп мешавад фаҳмид, ки эҳтимоли ҳамлаи заминии Амрико ба Эрон хеле зиёд шудааст.
