Тоҷикистон метавонад дар оянда ба яке аз нуқтаҳои муҳими пайвасткунандаи роҳҳои нақлиётӣ миёни кишварҳои ИДМ ва минтақаҳои Осиё табдил ёбад.
Ин мавзуъ дар доираи як ҳамоиши байналмилалии нақлиётӣ-логистикӣ баррасӣ шудааст. Муовини вазири нақлиёти ҷумҳурӣ Шоиста Саидмуродзода дар ин нишаст таъкид карда, ки мавқеи ҷуғрофии Тоҷикистон барои амалӣ намудани чунин иқдом ҷавобгӯ буда, тамоми имкониятро фароҳам меорад.
Ба гуфтаи масъулони соҳа, ташкили долонҳои муосири нақлиётӣ, бахусус шабакаҳои мултимодалӣ, метавонад ба густариши савдо ва ҳамкориҳои иқтисодӣ дар сатҳи минтақавӣ мусоидат кунад. Дар баробари ин, барои истифодаи пурраи ин имкониятҳо, ислоҳоти ҷиддӣ дар зерсохторҳо зарур дониста мешавад.
Тавре худи намояндаи Вазорати нақлиёт таъкид мекунад, айни замон соҳаи нақлиёти кишвар бо мушкилоти зиёд рӯ ба рӯ аст. Аз ҷумла, сатҳи пасти ҳамоҳангии байни кишварҳо, норасоии имкониятҳои техникӣ ва куҳнаву фарсуда будани қисме аз роҳу шабакаҳо аз монеаҳои ҷиддӣ дар ин росто ном бурда мешаванд.
Бо вуҷуди ин, дар солҳои охир ташаббусҳо барои рушди роҳҳои байналмилалӣ бештар шудаанд. Масалан, тарҳҳои нави долонҳои нақлиётӣ, ки кишварҳои Осиёи Марказиро бо Чин, Эрон ва Аврупо мепайванданд, мавриди баррасӣ қарор доранд.
Коршиносон бар ин назаранд, ки дар шароити тағйирёбии роҳҳои ҷаҳонии савдо ва афзоиши таваҷҷуҳ ба минтақаи Осиёи Марказӣ, Тоҷикистон метавонад нақши “пули транзитӣ”-ро байни бозорҳои гуногун иҷро кунад.
Ба гуфтаи онҳо, бо истифода аз имкониятҳои ҷуғрофӣ ва рушди зерсохтори нақлиётӣ, Тоҷикистон метавонад ба як маркази муҳими транзитӣ табдил ёбад. Аммо барои расидан ба ин ҳадаф, сармоягузории бештар, ҳамоҳангии минтақавӣ ва навсозии шабакаҳои нақлиётӣ аҳамияти калидӣ доранд.
