Се шахси номаълум рӯзи сешанбе, 7-уми апрел дар шаҳри Истанбул назди бинои консулгарии генералии Исроил бо пулис тирпарронӣ карданд.
Бино ба иттилои мақомоти Туркия, дар натиҷаи ин даргирӣ яке аз ҳамлагарон кушта шуда, ду нафари дигар захмӣ ва боздошт гардиданд. Мақомоти пулиси Истанбул гуфта, ки ҳамчунин ду корманди пулис дар ҷараёни ин тирпарронӣ ҷароҳатҳои сабук бардоштанд.
Мақомоти амниятӣ изҳор доштаанд, ки то ҳол иртиботи ин афрод бо гурӯҳҳои ифротӣ тасдиқ нашудааст ва ҳеҷ гурӯҳе масъулияти ҳамларо бар уҳда нагирифтааст. Ва инчунин сабаби ба ин кор даст задани муҳоҷимон низ нашр нашудааст.
Раисҷумҳури Туркия Раҷаб Тайиб Эрдуғон дар як изҳороте ин ҳодисаро “амали террористӣ” номида, гуфтааст, ки нерӯҳои амниятӣ тавонистанд аз як ҳамлаи эҳтимолии бузургтар пешгирӣ намоянд.
Баъзе расонаҳо ва манбаъҳои ғайрирасмӣ номҳои эҳтимолии ҳамлагаронро Юнус, Онур ва Анас зикр кардаанд, аммо ин маълумот то ҳол аз ҷониби мақомоти расмӣ тасдиқ нашудааст.
Дар робита ба ин қазия тафтишот идома дошта, интизор меравад ҷузъиёти бештар дар наздиктарин фурсат эълон гардад.
