Дар Русия бо дархости мақомоти тоҷик Амчигул Амиршоева, модари фаъоли шаҳрвандӣ Тутишо Амиршоеви 23-сола, ки моҳи ноябри соли 2021 дар ҷараёни эътирозҳо дар шаҳри Хоруғ кушта шуда буд, боздошт ва ба Тоҷикистон истирдод гардид.
Бино ба иттилои рӯзноманигори шинохта Анора Саркорова, боздошти Амчигул Амиршоеваи 55-сола рӯзи 6-уми апрел тақрибан соати 15:00 дар Маскав ҳангоми баргаштан аз ҷои кор сурат гирифта, дар он кормандони мақомоти ҳифзи ҳуқуқи Русия ва Тоҷикистон иштирок доштаанд. Ва шаби 6 ба 7-уми апрел ин модарро ба Душанбе истирдод кардаанд.
Гуфта мешавад, нисбати Амиршоева дар Тоҷикистон парвандаи ҷиноятӣ оғоз гардидааст. Сабаби боз шудани парванда шарҳҳои ӯ дар интернет мебошад, ки дар онҳо аз амалҳои сохторҳои қудратӣ ва мақомоти Вилояти Мухтори Кӯҳистони Бадахшон интиқод кардааст.
Ин модар аз ҷониби мақомоти Тоҷикистон дар ҷустуҷӯи байналмилалӣ қарор низ дода шуда, маълумоташ ба пойгоҳи ҷустуҷӯи ВКД-и Русия низ ворид гардида буд.
Амчигул Амиршоева зодаи ноҳияи Роштқалъа буда, солҳои охир дар муҳоҷирати корӣ дар Русия қарор дошт. Ба гуфтаи наздиконаш, ӯ борҳо зери фишор қарор гирифта, аз ҷониби мақомоти қудратии Тоҷикистон таҳдидҳо дарёфт кардааст, то нашри мавод дар бораи писари фавтидаашро қатъ намояд.
Ҳамчунин ба иттилои манбаъҳо, кормандони КДАМ ва ВКД-и кишвар фаъолияти хешовандони қурбониёни эътирозҳои солҳои 2021–2022-ро дар самти гиромидошти хотираи онҳо маҳдуд намуда, нашри аксҳо, баргузории чорабиниҳои ёдбуд ва паҳн кардани маълумот дар бораи онҳоро дар шабакаҳои иҷтимоӣ манъ кардаанд.
Ба гуфтаи Анора Саркорова, бо вуҷуди изҳороти Эмомали Рахмон дар бораи бекор кардани ҷавобгарии ҷиноятӣ барои “лайк”, бознашр ва шарҳҳо дар шабакаҳои иҷтимоӣ дар моҳи майи соли 2025, тибқи маълумоти дастрас, дар як соли охир на камтар аз даҳ сокини ВМКБ бо чунин иттиҳомҳо ба муҳлатҳои тӯлонии зиндон маҳкум шудаанд.
