Тарҳи украинӣ “Зистан мехоҳам” (Хочу жить) дар гузориши нави худ хабар додааст, ки 3 ҳазору 407 зодаи Тоҷикистон дар сафи артиши Русия алайҳи Украина меҷанганд. Ин омор рӯзи 20-уми апрел нашр шудааст.
Ба иттилои ин манбаъ, дар маҷмуъ маълумоти 12 ҳазору 666 нафар аз кишварҳои Осиёи Марказӣ муайян шудааст, ки бо Вазорати дифои Русия шартнома баста, дар ҷанг иштирок доранд. Аз ҷумла, бештарини онҳо зодагони Узбекистон (4 853 нафар) буда, баъдан Тоҷикистон (3407 нафар), Қазоқистон (2 389 нафар), Қирғизистон (1 439 нафар) ва Туркманистон (578 нафар) дар ин ҷанг ҳузур доранд.
Гуфта мешавад, ки шумораи иштирокчиён нисбат ба соли 2025 афзоиш ёфтааст. Он замон дар рӯйхати ин тарҳ 5 ҳазору 740 нафар аз тамоми кишварҳои Осиёи Марказӣ сабт шуда буд.
Гузоришҳои қаблии тарҳи “Зистан мехоҳам” низ ба масъалаи иштироки шаҳрвандони Тоҷикистон дар ҷанг ва талафоти онҳо ишора кардаанд. Ба иттилои ин манбаъ, моҳи октябри соли гузашта рӯйхати 446 шаҳрванди Тоҷикистон нашр шуд, ки гуфта мешавад, дар ҷанг ҷони худро аз даст додаанд. Ҳамчунин зикр гардидааст, ки танҳо дар шаш моҳи аввали соли 2025 ҳудуди 628 нафар бо артиши Русия шартнома бастаанд. Пеш аз ин низ дар бораи 931 шаҳрванди тоҷик, ки дар ҷанг иштирок доштаанд, маълумот нашр шуда буд.
Бо вуҷуди ин, то кунун мақомоти Тоҷикистон ба чунин гузоришҳо посухи расмӣ надодаанд. Қаблан додситони кулли кишвар таъкид карда буд, ки ҳеҷ як шаҳрванди Тоҷикистон барои иштирок дар даргириҳои Украина ба ҷавобгарии ҷиноятӣ кашида нашудааст.
Ҳамчунин гузоришҳо нишон медиҳанд, ки бисёре аз шаҳрвандони кишварҳои Осиёи Марказӣ, аз ҷумла зодагони Тоҷикистон, ки дар Русия дар маҳбас қарор доранд, бо ваъдаи озодӣ ё додани шаҳрвнадӣ барои иштирок дар ҷанг розӣ мешаванд ва шартнома мебанданд.
