Чандест дар бозорҳои кишвар муҳимтарин маводи сохтмонӣ – семент камёб шуда, нархи он ҳам назар ба моҳҳои пеш хеле гарон шудааст.
Дар пасманзари камчин шудани семент ва гарон шудани бесобиқаи нархи он дар бозорҳои Тоҷикистон, рӯзи 28-уми май Эмомали Раҳмон дар ҷаласаи ҳукумат дастур додааст, ки дар чанд минтақаи кишвар чор корхонаи нави истеҳсоли семент сохта шавад.
Ба иттилои Дафтари матбуоти Президенти Ҷумҳурии Тоҷикистон, корхонаҳои нав бояд то соли 2029 ба истифода дода шаванд. Иқтидори умумии онҳо 6 миллион тонна арзёбӣ шуда, гуфта мешавад, ки наздики 5 ҳазор нафар бо ҷойи кор таъмин хоҳанд шуд.
Ин тасмим дар ҳолест, ки сокинон аз гарон шудани семент нигаронӣ мекунанд. Агар чанд ҳафта пеш як халта семент бо қимати 45–50 сомонӣ фурӯхта мешуд, ҳоло нархи он дар баъзе ҷойҳо ба 70–80 сомонӣ расидааст. Дар баъзе нуқтаҳои фурӯши масолеҳи сохтмонӣ дар Душанбе ҳатто камбуди семент мушоҳида мешавад.
Гуфта мешавад, аз кор мондани баъзе корхонаҳои истеҳсоли семент дар мавсими кору биносозӣ яке аз сабабҳои асосии камбуди ин мавод дар бозор шудааст. Ҳамчунин фаъолияти миёнаравҳо низ ба болоравии нархи семент таъсир расонда, дар баъзе ҳолатҳо боиси гарон шудани семент гардидааст.
Аксари корхонаҳои семент дар Тоҷикистон бо сармоя ва технологияи Чин сохта шудаанд. Ҳоло маълум нест, ки чор корхонаи нави эълоншуда аз ҳисоби кадом сармоя ва ё бо иштироки кадом кишварҳо бунёд хоҳанд шуд.
Коршиносон мегӯянд, идомаи гароншавии нархи семент метавонад ба бозори манзил таъсири ҷиддӣ расонад. Ба бовари онҳо, гарон шудани масолеҳи сохтмонӣ эҳтимол қимати хонаҳоро боло бурда, пеш аз ҳама ба ҷайби сокиноне зарба мезанад, ки мехоҳанд хонаи шахсии худро бунёд кунанд.
