Як афсари Нерӯҳои марзбонии Тоҷикистон ҳангоми оббозӣ дар ноҳияи Шамсиддини Шоҳин ғарқ шуда, ҷон бохтааст. Дар бораи ин ҳодиса мақомоти кишвар то ҳол иттилои расмӣ нашр накардаанд.
Ба иттилои Радиои Озодӣ, ҳалокшуда капитан Ҷаҳонгир Давлатов, 26-сола буда, ҳодиса рӯзи 6-уми август дар дараи Зарбуз рух додааст.
Гуфта мешавад, Ҷаҳонгир Давлатов ҳамроҳи ҳамкоронаш барои оббозӣ ба кӯле рафтааст, ки дар назди як корхонаи заршӯӣ ҷойгир буда, барои шустани сангу шағал сохта шудааст. Ба гуфтаи манбаъ, кӯл чуқур буд ва афсар ҳангоми оббозӣ ғарқ шудааст.
Ҳамкоронаш баъди берун овардани ҷасади ӯ аз об ба мақомоти дахлдор хабар додаанд. Пас аз анҷоми ташхис, ҷасади марҳум ба наздиконаш дар ноҳияи Исмоили Сомонии шаҳри Душанбе супурда шудааст.
Дараи Зарбуз дар соҳили дарёи Панҷ ва дар наздикии сарҳади Тоҷикистон бо Афғонистон ҷойгир буда, дар он ҷо ду ширкати истихроҷи тилло фаъолият мекунанд. Барои фаъолияти заршӯӣ дар ин минтақа кӯлҳои сунъӣ бунёд шудаанд.
Ин дар ҳолест, ки дар ду моҳи охир чандин ҳодисаи ғарқшавии кормандони Нерӯҳои марзбонӣ дар вилояти Хатлон сабт шудааст. Пештар низ як марзбон дар ноҳияи Қубодиён ва ду корманди дигари ин ниҳод дар ноҳияи Фархор ҳангоми афтодан ба дарёҳои Ому ва Панҷ ҷон бохта буданд.
Такрори чунин ҳодисаҳо нигарониҳоро дар бораи риояи чораҳои бехатарӣ ҳангоми фаъолияти кормандони ниҳодҳои низомӣ дар минтақаҳои наздимарзӣ ва мавзеъҳои хатарнок бештар кардааст.
