Нишастҳои навбатии Созмони Амният ва Ҳамкории Аврупо дар мавриди санҷиш ва баҳодиҳии ҳуқуқи инсон дар шаҳри Варшава, пойтахти Лаҳистон аз имрӯз, 5-уми октябри соли 2026 шуруъ шуд.
Дар нишастҳои САҲА масъалаҳои ҳуқуқи башар, озодиҳои бунёдӣ, озодии баён ва расона, ҳуқуқ ва озодиҳои ақалиятҳо, интихоботи озод ва ғайра баҳсу баррасӣ мешаванд. Ин нишастҳо то 15-уми октябр идома хоҳад кард.
Нишасти имсола таҳти раҳбарии Суис (Швейцария) баргузор шуда, дар он намояндагони 57 давлати узв, шарикон ва ниҳодҳои САҲА ва дигар сохторҳо, инчунин намояндагони созмонҳои байниҳукуматӣ ва ҷомеаи шаҳрвандӣ ширкат мекунанд.
Ин нишаст ҳар сол як маротиба дар шаҳри Варшава баргузор мегардад, аммо ба сабаби авҷи бемории ҳамагири COVID-19 солҳои 2020 ва 2021 баргузор нашуда буд.
Бояд гуфт, дар нишастҳои Созмони Амният ва Ҳамкоири Аврупо дар мавриди санҷиш ва баҳодиҳии ҳуқуқи инсон солҳои 2016 то 2019 миёни мухолифони тоҷик ва намояндагони ҳукумат баҳсҳои зиёде сурат гирифта буд.
Аммо чанд соли ахир Тоҷикистон ҳамроҳи Русия ва Белорус дар ин нишастҳо иштирок надоранд. Ва дар рӯзи аввали нишасти имсола низ курсии Тоҷикистон холӣ аст.
Аммо ба намояндагӣ аз Тоҷикистон, ба ҷуз намояндагони ҳукумат, аз мухолифин “Гурӯҳи 24”, Паймони миллии Тоҷикистон (ПМТ) ва дигар шахсони ҷомеаи шаҳрвандӣ дар ин нишаст ҳузур доранд.
Мақомоти Тоҷикистон то ҳол расман шарҳ надодаанд, ки чаро намояндагонаш дар чанд нишасти соли ахир иштирок надоранд.
