Бонки осиёии рушд ироаи кумаки бебозгашт дар ҳаҷми 30 миллион доллар ба Тоҷикистонро тасдиқ кардааст. Азия-Плюс менависад, ки ин маблағ бо мақсади беҳбуди ҷойи кор ва таъмини музди меҳнати хуб, инчунин, тавсеъаи имконоти агентиҳои шуғл ва муҳоҷират ҷудо шудааст.
Илова бар ин, маблағи 1,5 млн доллари Фонди технологияҳои иттилоотӣ ва коммуникатсионии Ҷопон низ тасдиқ шудааст, ки расмиёти маъмурии он аз ҷониби БОР анҷом дода мешавад.
“Лоиҳаи мазкур бахусус ҳозир хеле муҳим аст, зеро дар Тоҷикистон афзоиши бекорӣ ва шумори муҳоҷирони баргашта бар асари пандемия пешбинӣ мешавад”, – гуфтааст намояндаи департаменти БОР Эйко К.Изава.
Дар доираи лоиҳа дар Хуҷанду Бохтар ва Восеъ се маркази нави хизматгузорӣ барои муҳоҷирони баргашта ва онҳое, ки азми сафар доранд, се маркази нави намунавии кор дар Душанбе дар соҳаи сайёҳӣ, дар Роғун дар бахши энергеика ва дар Данғара дар соҳаи кишоварзӣ таъсис дода мешаванд.
Амалисозии лоиҳа дар зарфи шаш сол пешбинӣ гардида, агентии иҷрокунандаи он Вазорати меҳнат, муҳоҷират ва шуғли аҳолии Тоҷикистон мебошад.
Коршиносони умури иҷтимоӣ мӯътақиданд, ки ин сӣ миллион доллар кумаки ройгон ва ё билоивази Бонки Осиёии Рушд баъид аст, ки дар амри татбиқи аҳдофи барномааш дуруст ҷобаҷогузорӣ шавад. Бахусус, ки татбиқ ва иҷрои он ба уҳдаи Вазорати меҳнат, муҳоҷират ва шуғли аҳолӣ – як ниҳоди давлатӣ вогузор шудаст. Зеро мегӯянд ниҳодҳои давлати Тоҷикистон дар бештарини ҳолатҳо фасодзадаанд ва маблағи грантии Бонки Осиёии Рушд, ки наҳваи назорати иҷрои он норӯшан аст дар гумон аст, ки мақсаднок истифода шавад. Ба назари ин коршиносон, беҳтар ва муассиртар мебуд, ки ин маблағ тавассути созмонҳои иҷтимоӣ ва ниҳодҳои давлатӣ дар маҳалҳо масраф карда мешуд.
