Майк Помпео, вазири умури хориҷии Амрико бо ҳамтоёни худ дар кишварҳои Осиёи Марказӣ як ҷаласаи онлайнӣ анҷом додааст.
Дар вохӯрӣ вазирони корҳои хориҷии ИМА – Майк Помпео, Тоҷикистон – Сироҷиддин Муҳриддин, Узбекистон – Абдулазиз Комилов, Қазоқистон – Мухтор Тлеуберд, Қирғизистон – Чингиз Айдарбеков ва Туркманистон – Рашид Мередов иштирок карданд.
Ҷонатан Ҳеник, муовини ёвари вазири умури хориҷии Амрико дар як гуфтугӯи онлайнӣ рӯзи 1-уми июл гуфт, Майк Помпео ба пуштибонии Амрико аз истиқлол ва тамомияти арзии кишварҳои ОМ таъкид карда ва гуфтааст, ки ин асоси стратегияи кишвараш дар ин минтақа мебошад. Ба гуфтаи ин дипломати амрикоӣ, Майк Помпео ҳамвора таъкид кардааст, ки Амрико ба субот, пешрафт ва амнияти Осиёи Миёна алоқа дорад.Ӯ гуфт, сиёсати кишвараш ин будааст, ки итминон ҳосил шавад, ки кишварҳои Осиёи Марказӣ дар интихоби манфиатҳои миллии худ озод ҳастанд ва дар тиҷорат, рушд ва муваффақият вобастаи ҳеҷ кишваре набошанд.
“Мо барои Осиёи Марказии пешрафта ва ниҳоят амн, ки ин кишварҳо, Амрико ва ҷомеаи ҷаҳонӣ фоида барад, кор мекунем”, – гуфтааст Ҷонатан Ҳеник, муовини ёвари вазири умури хориҷии Амрико.
Ба гуфтаи оқои Ҳеник, яке аз мавзуъҳои меҳварии гуфтугӯи рӯзи сешанбе, пандемияи COVID-19 ва таъсири он ба иқтисоди ҷаҳонӣ ва минтақаи Осиёи Марказӣ буд. Амрико то ба ҳол барои кишварҳои шарики худ дар минтақа барои пешгирӣ ва назорати ин беморӣ 25 миллион доллар кӯмак кардааст.
Ба гуфтаи Ҷонатан Ҳеник, кишварҳои Осиёи Марказӣ бояд ба дунболи ислоҳоти сохторӣ ва дарозмуддат бошанд, ки битавонад суботи сиёсии пойдор, дарозмуддат ва рушди иқтисодиро барои мардум тазмин кунад.
Дар музокироти вазирони умури хориҷии Амрико ва Осиёи Марказӣ субот дар минтақа ба шумули раванди сулҳ дар Афғонистон баҳс шудааст.
Вохӯрии гуруҳи мавсум ба “С5+1” аз соли 2015 баргузор мешавад. Аз он сол Иёлоти Муттаҳидаи Амрико ва панҷ кишвари Осиёи Марказӣ дар ҳошияи нишасти Маҷмаи умумии Созмони Милали Муттаҳид чаҳорчӯбаи нави ҳамкориро барои баррасии масъалаҳои минтақавӣ муқаррар кардаанд.
