Бино ба гузориши Радиои Озодӣ имрӯз 13 августи соли 2020 Гулназар Келдӣ, муаллифи Суруди миллӣ ва шоири халқии Тоҷикистон, дар 75-солагӣ дар бемористони “Истиқлол” аз олам даргузашт. Маросими дафни шоир фардо баргузор мешавад. Дар ин бора писари шоир, Дилписанд Келдиев ба Радиои Озодӣ хабар дод.
Тибқи маълумоте, ки дар шабакаҳои иҷтимоӣ аз тарафи шогирдон ва наздикони шоир нашр шуда буд, номбурда ҳафтаи гузашта бо нишонаҳои гирифторӣ ба бемории вируси COVID-19 дар беморхонаи “Истиқлол” бистарӣ шуда буд. Худи ӯ рӯзи 4-уми август дар суҳбат бо Радиои Озодӣ гуфта буд, ки зиёд сулфа мекунад. Рӯзҳои ахир зери дастгоҳи нафасдиҳии сунъӣ буд.
Суруди миллии имрӯзаи Тоҷикистон, ки бо номи “Диёри арҷуманди мо” сари забони ҳамагон аст, шеъри офаридаи Гулназар Келдӣ мебошад. Шеъри мазкур соли 1991 ба унвони “Суруди миллии Тоҷикистон” ҷойгузии шеъри Абулқосим Лоҳутӣ шуд.
Гулназар Келдӣ дар гузашта дар маҷаллаи “Садои Шарқ” ва нашрияҳои “Пайванд”, “Адабиёт ва Санъат” ва “Ваҳдат” ба ҳайси мудири шуъба ва сардабир кор кардааст. Аз соли 2005 то 2010 вакили Маҷлиси Намояндагон буд. Ӯ соли 2016 аз ҷониби Палатаи Аврупо (Evrochambres.org) бо дипломи «Diploma di Merito» ва медали Аврупо барои заҳматҳои илмию фарҳангияш қадрдонӣ шуда буд.
