Татбиқи лоиҳаҳои Бонки Осиёии Рушд (БОР) дар соли 2020 дар Тоҷикистон, сарфи назар аз мушкилоти пандемияи COVID-19, дар маҷмӯъ қаноатбахш буд. Дар ин бора дар як ҷаласаи муштараки намояндагони БОР ва ҳукумати Тоҷикистон гуфта шуд.
Тибқи иттилои дафтари БОР дар Тоҷикистон, дар ин нишаст баррасии солонаи татбиқи лоиҳаҳо дар соли 2020 ҷамъбаст карда шуданд.
“Соли 2020 соли бесобиқа дар саросари ҷаҳон ва душвор барои лоиҳаҳо буд. Аммо бо дастгирӣ ва саъйи қавии ҳамкасбони худ мо тавонистем, ки баъзе мушкилиҳоро паси сар намоем ва натиҷаҳои хуб ба даст орем.”,-гуфт Шанни Кэмпбелл, намояндаи доимии БОР дар Тоҷикистон.
Бо вуҷуди ин, ду лоиҳа бо сабаби ба итмом нарасидани қарордодҳо ва пардохтҳо бо сабаби пандемияи COVID-19 ҳамчун “дар хатар” қарор дода шуданд. Инчинун иштирокчиёни маҷлис масъалаҳои умумиеро, ки ба татбиқи лоиҳаҳо таъсир мерасонанд, муҳокима намуда, дар бораи нақшаи чорабиниҳо барои ҳалли онҳо ба мувофиқа расиданд.
Дар соли 2020 ба сандуқи БОР дар Тоҷикистон 18 лоиҳа бо маблағи умумии 960 миллион доллари амрикоӣ шомил буд. Аз он 91% дар асоси грант маблағгузорӣ шудааст.
Нақлиёт ва энергетика бузургтарин гирандагони кумаки БОР дар соли 2020 ба шумор рафта, аз маблағи умумӣ 35,9% ва 34,4%-и онро дарёфт кардаанд. БОР инчунин лоиҳаҳои кишоварзӣ, захираҳои табиӣ, рушди деҳот, таъминоти об, инфрасохтори шаҳрӣ ва хидматрасонӣ, тандурустӣ, маориф ва бахши молияро маблағгузорӣ кардааст.
Инчунин дар ин муддат 9 лоиҳаи грантии кӯмаки техникӣ ба маблағи умумии 6,9 миллион доллари амрикоӣ амалӣ карда шудааст.
Тоҷикистон аз соли 1998 бо БОР ҳамкорӣ дорад. Дар ин 23 сол БОР бузургтарин шарики бисёрҷонибаи рушд барои Тоҷикистон гардид. Дар ин муддат БОР ба Тоҷикистон беш аз 2,1 миллиард доллари ИМА, аз ҷумла беш аз 1,6 млрд $ ИМА дар шакли грантҳо ҷудо намудааст.
