Дар пайи ҷанги навбатии муҳоҷирон дар Маскав, ки 18-уми август дар як хобгоҳ ба вуқуъ пайваста буд, 20 нафар боздошт ва дасти кам 5 нафари онҳоро ҳукми ихроҷ аз Русия таҳдид мекунад.
Вазорати корҳои дохилаи Русия иттилоъ дод: “Дар хобгоҳи кӯчаи Адмирал Корнилов тартиботи ҷамъиятӣ вайрон карда шуд. Дар байни шаҳрвандони номаълум муноқиша ба амал омад, ки он ба занозанӣ табдил ёфт.”
Ба гуфтаи мақомоти корҳои дохила, муноқишаро ду нафар оғоз кардаанд, вале феълан ҳуввияташон мушаххас нашудааст. Дар навори видеоие, ки дар вебсайти ВКД интишор шудааст, дида мешавад, ки гӯё шиносҳо ва хешовандони муҳоҷиҷирон талош доранд, онҳоро аз ҳам ҷудо кунанд, аммо дере нагузашта худи онҳо низ вориди ҷанг мешаванд.
Ба гуфтаи сардори шӯъбаи ВКД-и Русия дар Маскав: “Нисбат ба ҳафт шаҳрванд протоколи маъмурӣ тибқи қисми 1 моддаи 20.1-и Кодекси ҳуқуқвайронкунии маъмурии Федератсияи Русия (Майдаавбошӣ) тартиб дода шудааст, ки панҷ нафари онҳо тибқи қисми 3.1 моддаи 18.8-и Кодекси ҳуқуқвайронкунии маъмурии Федератсияи Русия (Вайрон кардани шаҳрванди хориҷӣ ё шахси бешаҳрванд қоидаҳои вуруд ба Федератсияи Русия ё режими будубош (истиқомат) дар Федератсияи Русия) тартиб дода шуд.”
Инчунин Додгоҳ боздоштшудагонро ба 12 рӯзи ҳабс маҳкум карда, нисбати панҷ шаҳрванд дар бораи иҷозати вуруд ба Федератсияи Русия ва ихроҷи онҳо аз кишвар қарор қабул карда мешавад, мегӯяд сардори шӯъбаи ВКД-и Русия дар Маскав, полковники Хадамоти дохилӣ Владимир Васенин.
Гуфтанист, дар ин авохир дар минтақаҳои гуногуни Русия зуд-зуд задухурдҳои гурӯҳӣ байни муҳоҷирон сурат гирифта, иштирокчиёни онҳо боздошт ва бо ҳукми суд аз Русия ихроҷ мешаванд ва ба муддатҳои тӯлонӣ вуруди онҳо ба ин кишвар манъ мешавад.
