Аҳмад Масъуд, раҳбари Ҷабҳаи муқовимати миллии Афғонистон бо интишори як фарохони умумӣ аз мардуми Афғонистон хост, ки алайҳи Толибон қиём кунанд.
Аҳмад Масъуд, дар паёми савтие ишғоли Панҷшерро аз сӯи Толибон рад намуд ва тамоми мардуми Афғонистонро ба қиём алайҳи Толибон даъват кард. Масъуд мегӯяд, ки Толибон то ба ҳол ба назорати комили Панҷшер даст наёфтааст ва муқовимат алайҳи гурӯҳи Толибон дар ин вилоят идома дорад.
Аҳмад Масъуди хурдӣ, ки ҳоло масъуляти раҳбарии Ҷабҳаи муқовимати миллии Афғонистонро бар уҳда дорад, бо мурҷиати савтие аз неруҳои муқовимат даъват кард, то алайҳи Толибон қиём кунанд ва таъкид намуд, ки то озод шудани кишвар ва “пирӯзӣ барои Афғонистон” муқовимат кунанд.
Масъуд мегӯяд: “дирӯз пас аз эъломияи уламои сартосари кишвар, ҷабаҳаи муқовимати миллӣ файсалаи уламора наҳоӣ ва лаббайк гуфт ва эҳтиром гузошт, аммо Толибон хушбахтона ки тиннати вақеъии худро нишон доданд ва билохира бар хилофи чизе, ки дар зоҳир мегуфтанд, нишон доданд, ки на боваре ба шариъат доранд, на боваре ба Қуръон доранд ва на файсалаи уламои сартосари Афғонистнро боварманд ҳастанд”.
Ӯ ҳамазамон гуфт, ки баъд аз файсалаи уламо, Толибон ҳуҷуми густурдаеро болои миллату мардуми мо шурӯъ карданд, ки боъиси кӯшта шудани теъдоди зиёде аз ҳамаватанони мо, аз ҷумла бахше аз хонаводаи мо шуд.
Дар зимн Аҳмад Масъуд гуфт: “Ман аз тамоми мардуми Афғонистон, ҳамаи бародарону хоҳарони мо дар тамоми гӯшаҳои кишвар даъват мекунам, ки ба истибдодгарон муқовимат кунанд”.
Масъуд ҳамчунин дар хитоб ба ҷомеъаи Ҷаҳонӣ гуфт, ки мутаассифона иҷоби фурсати ғалат ба Толибон ва додани фурсати сиёсӣ боис шуд, ки онҳо ҳам фурсати сиёсӣ пайдо бикунанд ва ҳам ба дунё нишон бидиҳанд, ки онҳо тағйир карданд. Дар ҳоле, ки Толиб ба ҳиҷ унвон тағйир накарда, балки золимтар ва ифротитар шуда аст.
Пештар Ҷабҳаи муқовимат эълон карда буд, ки ба пешниҳоди уламои Афғонистон дар барои “қатъи фаврии ҷанг” мувофиқ ҳаст ва дар ҳоли берун рафтани низомиёни Толибон аз вилояти Панҷшер онҳо ҷангро қатъ мекунанд. Аммо Толибон пешниҳоди мусолаҳаро рад кард ва сухангӯи ҳаркат гуфт, “Ҷабҳаи муқовимат дар Панҷшер фурсати гуфтугӯро аз даст додааст”.
Панҷшер аз замони суқути Кобул дар рӯзи 15-уми августи соли ҷорӣ то кунун дар муҳосари Толибон қарор дорад ва тайси 10 рӯзи ахир ҳамла ба вилоят оғоз шудааст.
