33.9 C
Dushanbe

“Облава”-и ҷавонон баъд аз анҷоми даъвати тирамоҳӣ

Як сокини 20-солаи шаҳри Турсунзодаро аз назди зинапояи ҳавопаймо дар фурӯдгоҳи Кӯлоб “облава” карда, ба артиш бурданд. Дар ин бора “Азия-Плюс” аз қавли як хеши наздики он ҷавон хабар дод.

Гуфта мешавад, ин ҷавон 2 сол боз дар Русия дар муҳоҷирати меҳнатӣ қарор доштааст ва бо шунидани бемории бибиаш рӯзи 9-уми декабр ба Тоҷикистон баргаштааст.

Ба гуфтаи яке аз наздикони ин ҷавон, вақте падару модараш ӯро дар хона интизор буданд, ӯ ногаҳон ба падараш занг зада гуфтааст, ки дар фурӯдгоҳи Кӯлоб “облава” шудааст.

Баъд аз шунидани ин хабар падари ҷавон аз шаҳри Турсунзода ба фурӯдгоҳи Кӯлоб меравад ва кормандони фурӯдгоҳ ба ӯ мегӯянд, ки писарашро ба комиссариати ҳарбии ноҳияи Ҳамадонӣ бурдаанд.

Падари ҷавони “облавашуда” ҷомадони писарашро аз дасти корманди фурӯдгоҳ мегирад ва ба комиссариати ҳарбии ноҳияи Ҳамадонӣ меравад, аммо писарашро онҷо пайдо намекунад.

Пас аз як рӯз ин ҷавон худаш занг зада мегӯяд, ки дар комиссариати ҳарбии шаҳри Бохтар қарор дорад ва ба зудӣ ба қисми ҳарбӣ фиристода мешавад.

Вақте падараш ба Бохтар меравад, миёнаравҳое онҷо пайдо шудаанд, ки барои озод кардани ин ҷавон аз артиш бар ивази маблағи ҳангуфт  пешниҳодҳое карданд, вале ӯ розӣ намешавад.

“Дирӯз, 12-уми декабр ҷиянамро ба яке аз қисмҳои низомии шаҳри Турсунзода фиристоданд”, – мегӯяд яке аз наздикони ин ҷавон.

Дар ҳамин ҳол, Қурбон Сафаров, муовини директори фурӯдгоҳи байналмиллалии Кӯлоб ба “Азия-Плюс” гуфт, ки “То анҷоми даъват чанде бо либоси мулкӣ назди даромадгоҳи фурӯдгоҳ меистоданд, лекин зиёда аз як ҳафта аст, ки онҳоро дар ин ҷо мушоҳида накардаам. Дар бораи “шикор” (облава)-и ҷавони 20-сола чизе нашунидаам ва хабар надорам”.

Инчунин “Азия-Плюс” аз як ҳодисае, ки чӣ тавр ҷавонро ногаҳон аз донишгоҳ хориҷ карда, ба артиш бурданд, хабар дод.

“Бародари хурдии ман Фурқатҷон Рӯзиев дар факултаи “Киммиё ва биология”-и Донишгоҳи давлатии Хуҷанд таҳсил мекард. То ин дам ӯ мудом дар дарсҳо иштирок мекард ва пули шартномаи таҳсилро саривақт пардохт кард. Лекин 7 декабр ӯро аз донишгоҳ гирифта, ба комиссариати ҳарбӣ бурдаанд. Аз куҷое дар китоби давомоти донишгоҳ зиёда аз 48 соат аломати “ғоиб будан дар дарс” (НБ) пайдо шудааст”, – мегӯяд яке аз наздикони ин донишҷӯ.

Дар ҳоле ин ҷавон аз донишгоҳ хориҷ ва ба хизмат бурда мешавад, ки ба гуфтаи ҳамкурсонаш ӯ дар ҳама дарсҳо ҳузур дошт.

Чанде пеш Фаридун Маҳмадализода сухангӯи Вазорати мудофиаи Ҷумҳурии Тоҷикистон гуфта буд, ки 30-юми ноябри соли ҷорӣ даъвати тирамоҳӣ ба анҷом расид, аммо комиссариатҳои ҳарбии вилоятҳо, шаҳрҳо ва ноҳияҳо то оғози маъракаи навбатӣ даъватшавандагонро ба хизмати ҳарбӣ ҷалб мекунанд.

Маҳмадализода тамоми сол ҷалб шудани ҷавонон ба артишро ба омодагии пешакии ҳарбӣ қабл аз адои хидмати дусолаи сарбозӣ рабт дода буд.

Мавзӯи ҷалби ҷавонон ба артиш дар Тоҷикистон солҳо боз доғ мемонад. Ҳамасола дар сафи Қувваҳои мусаллаҳи ҶТ чандин нафар шиканҷа ва бар асари он ҷон медиҳанд. Ҳатто ҳолатҳои гум шудани афсарон низ вуҷуд дорад. Бештари ҷавонони тоҷик аз сабаби бад будани шароити хидмат аз артиш мегурезанд ва мақомот бо тарзи маҷбурӣ ё “облава” ҷавононро ба артиш сафарбар мекунад, ки ин амали мақомдорон ҳамеша дар ҷомеаи Тоҷикистон мавриди баҳс қарор дорад.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Анҷумани иқтисоди рақамии СҲШ дар шаҳри Тянҷзини Чин

Дар чаҳорчӯби Анҷумани иқтисоди рақамии Созмони ҳамкории Шанхай (СҲШ) дар шаҳри Тянҷзини Чин ҷаласаи пӯшидаи вазирони иқтисодии кишварҳои узви ин созмон баргузор гардид.

Боздошти як омӯзгори забони англисӣ дар Душанбе бо иттиҳоми рафтори ғайриахлоқӣ

Раёсати корҳои дохилии шаҳри Душанбе хабар дод, ки як марди 50-сола бо иттиҳоми рафтори ғайриахлоқи ба як гурӯҳ духтарони ҷавон боздошт шудааст.

Чаро мақомот дар бораи хабари ихроҷи муҳоҷирони афғонистонӣ хомӯшанд?

Масъулини муҳоҷирони афғонистонӣ дар Душанбе хабари ихроҷи шаҳрвандони Афғонистон аз Тоҷикистонро рад карданд.

Боздошти ду тоҷикистонӣ бо гумони ба асорат гирифтани ҳамватани худ

Мақомоти Русия хабар доданд, ки ду шаҳрванди Ҷумҳурии Тоҷикистон бо гумони ба асорат гирифтан ва латтукӯби як ҳамватани худ боздошт шудаанд.