Сафири Тоҷикистон дар Арабистони Саудӣ бо баргузории як нишасти матбуотӣ Қарори Ҳукумати Ҷумҳурии Тоҷикистон дар бораи ҷорӣ намудани низоми бераводиди яктарафа нисбат ба баъзе давлатҳои хориҷиро шарҳ дод.
Ин нишасти матбуотии сафири Тоҷикистон дар Подшоҳии Арабистон Саудӣ Акрам Каримӣ, ки рӯзи 2-уми январи соли ҷорӣ бо ҳузури намояндагони баъзе расонаҳо, фаъолони шабакаҳои иҷтимоӣ ва доираҳои алоқаманд ба сайёҳӣ ва сармоягузорӣ баргузор шуда буд, бо истиқболи гарми хеле аз фаъолон ва корбарони шабакаҳои иҷтимоӣ рӯ ба рӯ шуд.
Расонаҳои Арабистони Саудӣ ва давлати Кувайт ин иқдоми Тоҷикистонро ситоиш карда, бо хушҳолӣ менависанд, ки аз шурӯи моҳи январи соли 2022 шаҳрвандони ин кишварҳо метавонанд бидуни дошатани раводид ба Тоҷикистон сафар карда, то 30 рӯз дар он бимонанд.
Дар ҳамин ҳол рӯзномаи “Сурот Нюс”-и Кувайт хабар дода, ки дар нимаи семоҳои дувуми соли ҷорӣ парвозҳои мустақим байни Тоҷикистон ва давлати Кувайт ба роҳ монда мешавад.
Гуфта мешавад, пеш аз ин байни Тоҷикистону Амороти Муттаҳидаи Араб парвозҳои мустақим солҳо инҷониб амал мекунанд, аммо байни Тоҷикистону Кувайт ва Подшоҳии Арабистони Саудӣ нав оғоз хоҳад шуд.
Инчунин “дар ҳошияи нишасти матбуотӣ намоиши аксҳо таҳти унвони “Тоҷикистон – кишвари сайёҳии умедбахш” танзим гардида, ки дар он наворҳои инъикоскунандаи табиати зебо, имкониятҳои сайёҳӣ ва фазои сармоягузории Тоҷикистон ба намоиш гузошта шуданд”, зикр шудааст, дар хабари Вазорати корҳои хориҷӣ.
