Имрӯз 30-уми март қимати сӯзишвориҳои бензину дизел ва гази моеъ дар Тоҷикистон дар муқоиса бо ҳафтаи гузашта то 8% арзон шудааст.
Агар ҳафтаи пеш як литр гази моеъ 7 сомониву 40 дирам буд, имрӯз он дар вилоятҳои Суғду Хатлон ба 6 сомониву 80 дирам арзон шуда, қариб 8,1% арзиши он поин рафтааст. Дар нуқтаҳои фурӯши сӯзишвории Душанбе як литр гази моеъро мешавад бо нархи 7 сомонӣ пайдо кард.
Нархи як литр бензини АИ-92 нисбат ба ҳафтаи гузашта аз 12,2 сомонӣ ба 11,6 сомонӣ (4,9%) ва АИ-95 бошад аз 12,7 сомонӣ ба 12,1 сомонӣ (4,7 %) арзонтар шудааст.
Қимати сӯзишвории дизелӣ чандон тағйир наёфта, як литри он аз 12,4 сомонӣ то 12,3 сомонӣ (0,8 %) поин фаромадааст.
Коршиносон поин рафтани қимати фаровардҳои нафтӣ ва гази моеъро ба мустаҳкам шудани қурби рубл дар баробари доллар ва ба поин рафтани қимати сӯзишворӣ дар биржаҳои ҷаҳонӣ марбут медонанд.
Тибқи омори расмӣ, Тоҷикистон 86 дарсади фаровардҳои нафтиашро аз Русия ва ҳудуди 90 дарсади гази моеъро аз Қазоқистон ворид мекунад.
