Ширкати “Барқи тоҷик” бо нашри як муроҷиатнома эътироф кардааст, ки айни замон дар хеле аз шаҳру ноҳияҳои Тоҷикистон интиқоли нерӯи барқ ба мардум маҳдуд шудааст.
Имрӯз, 13-уми октябри соли 2022 Ширкати “Барқи тоҷик“ бо нашри як муроҷиатнома мегӯяд: “Аз рӯйи ҳисоби мутахассисони соҳа соли ҷорӣ низ норасоии мавсимии нерӯи барқ дар ҳаҷми беш аз як миллиард киловатт – соат пешгӯӣ карда шудааст.“
Ба гуфтаи масъулини ин ширкат, “маҷрои дарёи Вахш дар тобистон ба ҳисоби миёна аз 2000 то 2200 метри мукааб дар як сонияро ташкил дода, ин нишондиҳанда дар фасли зимистон ба 150 – 200 метри мукааб баробар мешавад. Бинобар ин, барои истеҳсоли барқ дар мавсими зимистон асосан оби дар обанбор захирашуда истифода мегардад.”
“Барқи тоҷик” таъкид мекунад: “Бо дарназардошти пешгӯӣ шудани норасоии мавсимии неруи барқ, эҳтимоли то баҳор басанда набудани захираҳои об дар низоми энергетикии кишвар ба миён омадааст.”
Ин дар ҳолест, ки хеле аз корбарони шабакаҳои иҷтимоӣ хабар дода буданд, ки масъулини ширкати “Барқи тоҷик” қатъи нерӯи барқро дар хеле аз шаҳру ноҳияҳои кишвар, аз он ҷумла дар шаҳри Душанбе аз аввали тирамоҳ, яъне аз моҳи сентябри соли ҷорӣ оғоз кардаанд.
Гуфта мешавад, маҳдудиятҳо дар раванди тақсими нерӯи барқ ба мардум, ба хусус дар фаслҳои тирамоҳу замистон ва аввали баҳор дар давоми беш аз ду даҳсолаи ахир дар Тоҷикистон ба яке аз мушкилҳои асосии кишвар табдил шудааст, даҳҳо роҳ, аз он ҷумла насби панелҳои офтобӣ, таъсиси шабакаҳои хурди барқӣ-обӣ, бодӣ ва ғайра барои рафъи ин мушкил вуҷуд дорад, вале Ҳукумат ва мақомоти кишвар намехоҳанд, ки онро сари вақт бартараф кунанд.
