Созмони Миллали Муттаҳид мегӯяд, беш аз 3 миллион кӯдаки тоҷикистониро хатари офатҳои рӯзмарраи табиӣ таҳдид мекунад.
Бино ба иттилои сомонаи ЮНИСЕФ, барномаи махсуси Созмони Миллали Муттаҳид дар Тоҷикистон, “барои беш аз се миллион кӯдак дар Тоҷикистон таъсири манфии офатҳои табиӣ ва тағйири иқлим як воқеияти ҳамарӯза аст.”
Ба қавли манбаъ, дар шароити кӯҳистонии Тоҷикистон ҳамарӯза “тарма, заминҷунбӣ, обхезӣ, сел ва ярч ба ҳуқуқҳои бунёдии кӯдакон таҳдид карда, зинда мондани онҳоро зери хатар мегузоранд ва ба онҳо имкон намедиҳад, ки тавоноии худро пурра ба даст оранд.”
Масъулини ин созмон мегӯянд, барои пешгиригӣ аз ин ҳолатҳо ва камтар кардани таҳдиди ин хатарҳо кӯдаконро аз синнӣ хурдӣ бояд омӯзиш диҳанд, то дар ҳолатҳои зарурӣ барои наҷоти худ ва кумак ба дигарон аз пеш омода бошанд.
Гуфта мешавад, ЮНИСЕФ аз соли 1993 ба ин сӯ дар Тоҷикистон “дар бахшҳои ҳифзи кӯдакон, тандурустӣ, сиёсати иҷтимоӣ, рушди барвақти кӯдакон ва таҳсилот, WASH (таъминоти об, санитария ва гигиена), вокуниш ба ҳолатҳои фавқулодда, тағирёбии иқлим ва омодагӣ ба офатҳои табиӣ, кӯдакони дорои маълулият ва ҷавонон кор мекунад.”
