Нигаронии хонавода ва наздикону пайвандони Абдуллоҳи Шамсиддин, фаъоли сиёсии Тоҷикистон, ки аз Олмон ба Тоҷикистон ихроҷ шуд, то рафт зиёдтар мешавад.
Имрӯз, 23-юми январи соли 2023, Шамсиддини Саид, фаъоли сиёсӣ ва яке аз раҳбарони Ҳизби наҳзати исломии Тоҷикистон дар посух ба суоли ин, ки аз писарашон Абдуллоҳ чӣ хабар аст, дар суҳбат ба Azda tv гуфт, “мутаассифона аз Абдуллоҳ ягон хабари дақиқ нест!”
Ба қавли Шамсиддини Саид, хонавода ва наздикону пайвандон ҳама “аз замони ихроҷи Абдуллоҳ аз Олмон ба Тоҷикистон то ҳол ҳеч хабари дақиқе дар даст надоранд, ки дар куҷову дар чӣ шароите писараш қарор дорад.”
Пас аз ихроҷи ин фаъоли сиёсии Тоҷикистон, ки бо ҳамкории сафорати Тоҷикистон дар Берлин сурат гирифт, то ҳол на мақомоти корҳои дохилӣ, на Хадамоти федеролии муҳоҷират ва на Вазорати корҳои хориҷии Олмон ва на Сафорати Олмон дар Тоҷикистон ба мактуб ва дархостҳои хонавода ва наздикону пайвандони Абдуллоҳи Шамсидин хабари мусабате надодаанд.
Пеш аз ин мақомоти Тоҷикистон ҳамтоёни олмониашонро мутақоид карда буданд, ки нисбат ба ин фаъоли сиёсӣ дар Тоҷикистон ҳеч гуна парвандаи ҷиноятие, ки ҳаёти ӯро таҳдид кунад, боз нашудааст. Аммо акнун вазъият фарқ мекунад. Вай бедарак шудааст. Панҷ рӯз шуд, ҳеч хабару иттилои дақиқе дар бораи сарнавишти ӯ вуҷуд надорад.
Инчунин пас аз боздошти ин писари яке аз раҳбарони Ҳизби наҳзати исломии Тоҷикистон дар Олмон сафорати Тоҷикистон дар Берлин низ камаш ду маротиба “Сертификати баргашт ба Ватан” ба номи Абдуллоҳи Шамсиддин ба дасти мақомоти олмонӣ дода буд ва онҳо низ ӯро дар ҳамин асос ба Ватан ихроҷ карданд.
Шамсиддини Саид, фаъоли сиёсии тоҷик бо нигаронии амиқ аз сарнавишти фарзандаш мегӯяд, “дар ҳоли ҳозир ҳама талошҳои мо ба он равона шудааст, ки чӣ аз мақомоти олмонӣ бошад ва ё чӣ аз мақомоти тоҷикистонӣ дар бораи дар куҷо ва дар чӣ шароите қарор доштани фарзандаш иттилои дақиқе дарёфт кунанд ва сипас вориди амал шаванд.”
Гуфта мешавад, 18-уми январи соли ҷорӣ мақомоти олмонӣ фаъоли сиёсии тоҷик Абдуллоҳи Шамсидинро тариқи ҳавопаймо нахуст ба Туркия ва сипас аз он ҷо ба Тоҷикистон ихроҷ карданд. Баъзе манобеъ мегӯянд, ки мақомоти тоҷик дар фурӯдгоҳи байналмилалии Душанбе Абдуллоҳи Шамсиддинро таҳвил гирифтанд ва ҷудо аз дигар мусофирон ӯро алоҳида бо худ ба ҷое номаълум ҳамроҳ бураданд.
Аммо бо гузашти наздик ба як ҳафта то ҳол на мақомоти Кумитаи давлатии амнияти миллӣ ва на аз Вазорати корҳои дохилӣ ва ё аз Прокуратураи Тоҷикистон ҳеч иттилое дар бораи замони боздошт ва дар куҷо нигаҳдорӣ кардани ӯ надодаанд.
