Сафорати Иёлати Муттаҳидаи Амрико дар Тоҷикистон мегӯяд, ки судури раводиди муҳоҷиратӣ барои тоҷикистониҳоро афзоиш додааст.
Бино ба иттилои расмӣ, Сафорати Иёлоти Муттаҳидаи Амрико дар Душанбе мегӯяд, давоми “камтар аз нӯҳ моҳи барасмиятдарории раводиди муҳоҷиратии ИМА як марҳилаи муҳимеро паси сар кард: 1000 раводиди муҳоҷиратӣ дар Тоҷикистон пешниҳод карда шуданд.”
Ба қавли манбаъ, Сафорати ИМА дар шаҳри Душанбе ба расмият даровардани раводиди муҳоҷиратии ИМА-ро аз 4-уми октябри соли 2022 шуруъ кард. Пеш аз ин раводиди муҳоҷиратии ИМА барои шаҳрвандон ва сокинони Тоҷикистон дар Консулгарии генералии ИМА дар ш. Алматои Қазоқистон ба расмият дароварда мешуд.
Гуфта мешавад, аксар онҳое, ки раводиди муҳоҷиратии ИМА-ро дарёфт мекунанд, ба хусус шаҳрвандони Тоҷикистон ҳамроҳи ҳамсару фарзандони худ тарки кишвар карда барои зиндагӣ ба ИМА кӯч мебанданд ва ба ғайр аз онҳо садҳо нафар аз роҳҳои қонунӣ ва ғайриқонунӣ вориди ин кишвар мешаванд ва талош мекунанд то муқими Амрико шаванд.
Дар семоҳаи аввали соли ҷорӣ ҳудуди 45 ҳазор тоҷикистонӣ шаҳрвандии Русияро дарёфт карданд ва дар баробар муҳоҷирати дигар тоҷикистониҳо ба кишварҳои ғарбӣ, ба хусус давлатҳои Амрико, Канада, Бритониё ва кишварҳои узви Иттиҳоди Аврупо низ тайи чанд соли ахир хеле зиёд шудааст.
