Ба муълумоти расмӣ, дар шашмоҳаи аввали соли ҷорӣ ба Тоҷикистон ҳудуди 130 адад мошинҳои барқӣ ворид шудааст.
Тавре хабаргузории “Авесто” бо такя ба маълумоти Хадамоти гумруки назди Ҳукумати Ҷумҳурии Тоҷикистон хабар дод, маблағи умумии воридоти мошинҳои барқӣ 3,4 миллион долларро ташкил додааст.
Гуфта мешавад, дар маҷмӯъ, дар ин муддат (6 моҳи аввали соли ҷорӣ) ба маблағи беш аз 189,2 миллион доллари амрикоӣ бештар аз 21,3 ҳазор адад воситаҳои нақлиёт ба кишвар ворид карда шудааст.
Хадамоти гумруки кишвар мегӯяд, ҳаҷми воридоти ҳамаи намуди воситаҳои нақлиёт дар шаш моҳи аввали соли ҷорӣ нисбат ба ҳамин давраи соли 2021 14,7 дарсад зиёд шудааст.
Ёдовар мешавем, ки бори аввал мошинҳои барқӣ дар авоили соли ҷорӣ бо ибтикори ҳукумати шаҳр ва ширкати “Як такси” ба Душанбе оварда шуд.
Гуфта мешавад, мошинҳои барқӣ аз нигоҳи иқтисодӣ камхарҷ ва барои ҳифзи ҳавои шаҳр низ судманд мебошанд. Батареяҳои ингуна мошинҳо дар давоми 30 дақиқа барқ мегиранд ва то 300 километр кифоят мекунад.