Дар тирамоҳи соли равон барӯйхатгирии аҳолии дар Тоҷикистон оғоз мешавад

Нашрияи "Садои мардум"-и Маҷлиси Олии Тоҷикистон имрӯз 13 август аз таърихи баргузории барномаи "Барӯйхатгирии аҳолӣ ва фонди манзил дар Ҷумҳурии Тоҷикистон" хабар дод. Тибқи ин хабар, барномаи барӯйхатгирии аҳолӣ дар кишвар аз 1 то 15 октябри соли 2020 гузаронида мешавад.

Барномаи мазкур дар Тоҷикистон ҳар 10 сол як маротиба доир мешавад, бори охир соли 2010 ин маърака шуда гузашт.

"Барӯйхатгирии аҳолӣ яке аз манбаъҳои муҳимтарини иттилоот дар бораи аҳолӣ буда, тавассути он маълумот оид ба нишондиҳандаҳои иқтисодӣ, иҷтимоӣ-демографӣ ва саводнокии аҳолӣ бо роҳи пурсиши фардии шаҳрвандон ба даст оварда мешавад. Бо ин мақсад барӯйхатгирии аҳолӣ бо дарназардошти имконияти давлат дар даҳ сол як маротиба баргузор мегардад".

Барӯйхатгирии аҳолӣ дар Ҷумҳурии Тоҷикистон баъд аз ба даст овардани истиқлолияти давлатӣ бори сеюм аст, ки гузаронида мешавад. Бори аввал моҳи янаври соли 2000 доир шуд, тибқи натиыащои он аҳолии кишвар 6 млну 127,5 нафар шуморида шуд, бори дуюм аз 21 то 30 сентябри соли 2010 баргузор гардид, ин навбат аз дигар барӯйхатгириҳо бо он фарқ мекард, ки дар он бори аввал барӯйхатгирии фонди манзил ҳамроҳ гардид. Ҳамчунин бори нахуст аз усули сканерии коркарди маълумот истифода шуд. Аз рӯи натиҷаҳои барӯйхатгирии аҳолӣ соли 2010 адади аҳолии Тоҷикистон 7 млну 565 ҳазор нафар гуфта шуд. Ва инак бори сеюм тирамоҳи имсол доир хоҳад шуд.

дар хусуси ин хабар "Садои мардум" менависад:

"Аз 1 то 15 октябри соли 2020 дар мамлакат маъракаи бузурги давлатию ҷамъиятӣ-барӯйхатгирии навбатии аҳолӣ ва фонди манзил доир мегардад. Агентии омори назди Президенти Ҷумҳурии Тоҷикистон тасмим гирифтааст, ки дар он аз технологияи муосир истифода намояд. Шаҳрвандони мамлакат ва шаҳрвандони хориҷие, ки муваққатан дар ҷумҳурӣ истиқомат мекунанд, метавонанд бо гирифтани рамзҳои махсус (логин – парол) ба сомонаи Агентии омор ворид шуда, саволномаҳои барӯйхатгириро пур кунанд ва ба махзани маълумоти Агентии омор ирсол намоянд. Ҳамчунин, дар маркази шаҳру ноҳияҳои ҷумҳурӣ терминалҳо барои гузаштан аз барӯйхатгирии аҳолӣ ва фонди манзил ташкил карда мешавад. Агар шаҳрвандон нахоҳанд, ки шахсони махсуси барои ин кор омодашуда ба манзили онҳо биёянд, метавонанд дар дилхоҳ вақти ба онҳо муносиб ба назди терминал рафта, бо ёрии намояндагони мақомоти омори давлатӣ ба саволҳо аз тариқи интернет ҷавоб диҳанд".

Бино ба ин хабар, ин бор мақомот ҳангоми барӯйхатгирии аҳолӣ нав­батӣ аз планшет истифода хоҳанд кард. Тибқи он масъулон ба манзили шаҳрвандон рафта, маълумоти фардии онҳоро ба планшет, ки бо шабакаи интернет пайваст шудааст, ҷамъоварӣ намуда, ба маркази маълумот мефиристанд.

Дар хусуси махфӣ будани маълумоти шахсии шаҳрвандон гуфта шудааст, ки "тибқи моддаи нуҳуми Қонуни Ҷумҳурии Тоҷикистон "Дар бораи барӯйхатгирии аҳолӣ" маълумоти шахсии аз аҳолӣ ҷамъкардашуда махфӣ буда, он дар шакли ҷамъбаст интишор карда мешавад. Барӯйхатгирии аҳолӣ ва фонди манзил бе талаби ҳуҷҷати тасдиқкунандаи маълумоти шахсӣ гузаронида мешавад".