Алексей Навалний баъди як моҳи табобат аз беморхона мураххас шуд
Раҳбари шинохтаи мухолифи ҳукумати Русия Алексей Навалний пас аз як моҳи ҷанг бо марг аз беморхонаи Шаритаи Берлин мураххас шуд. Олмон мегӯяд, ки вазъи умумии Навалний босуръат беҳтар мешавад. Дар ин бора хабаргузории олмонии “DW” иттилоъ дод.
Гуфта мешавад, мунаққиди маъруфи президенти Русия Владимир Путин, Алексей Навалний рӯзи чоршанбеи 23 сентябр аз беморхонаи Шарита дар Берлин рухсатӣ шуд. Вай бар асари заҳролудшавии шадид 32 рӯз дар беморхона бистарӣ буд. Навалний ҳафтаҳо дар шӯъбаи эҳёгарӣ ё ICU-и бемористон дар ҳолати комаи сунъӣ қарор дошт.
Табибон гуфтанд, ки саломатии ӯ хеле беҳбуд ёфтааст ва ӯро аз беморхона мураххас карданд. Ба гуфтаи табибони олмонӣ бори дигар ба шакли пурра барқароршавии саломатии Навалний имконпазир аст. Аммо мегӯянд, дар хусуси таъсир ва оқибатҳои дарозмуддати заҳролудшавии ӯ ҳоло чизе гуфтан барвақт аст.
Ба навиштаи рӯзномаи фаронсавии “Le Monde”, президенти Русия Владимир Путин дар гуфтугӯи телефонӣ бо ҳамтои фаронсавияш Эммануэл Макрон назарияи худкушии Навалнийро матраҳ кардааст.
Путин дар ин суҳбати худ гуфтааст, ки шояд Навалний бо заҳри навъи “Новичок” мехостааст худкушӣ кунад. Ӯ афзуда, ки Навланий эҳтимол дорад аз чанд роҳ бидуни дахолати кормандони давлатӣ ба ин заҳр даст ёфта бошад. Аз ҷумла чунин алоқаи эҳтимолӣ бо Латвия, яке аз кишварҳои истеҳсолкунандагони ин заҳр метавонад бошад.
Ба навиштаи “Le Monde” Макрон ҳамаи ин ҳадсу гумонҳоро қотеона рад кардааст.
Навалний рӯзи 20 август ҳангоми савор шудан ба ҳавопаймои маҳаллӣ аз Томски Сибир ба Маскав беҳол шуда аз ҳуш рафт. Сипас ҳавопаймо ба шаҳри Омск нишасти изтирорӣ анҷом дод ва Навалний ба бемористони шаҳр интиқол ёфт.
22 август ӯро ба беморхонаи Шаритаи Олмон интиқол доданд. Баъдан якчанд озмоишгоҳҳои махсуси аврупоӣ тасдиқ карданд, ки ин сиёсатмадори рус бо як омили асабии мамнӯи байналмилалӣ аз гурӯҳи “Новичок” заҳролуд шудааст. Ба боварии дӯстону наздиконаш Навалний аз нӯшидани оби заҳролуд аз зарфи плостикӣ, ки дар дохили меҳмонхона буд, заҳролуд шудааст.
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.