Роҳбари Раёсати омодагии оперативии Ситоди генералии Қувваҳои мусаллаҳи Русия генерал-лейтенант Фанил Сарваров дар пай такиши мошинаш ба ҳалокат расид.
Ба иттилои Кумитаи тафтишотии Русия, субҳи 22-юми декабр дар кӯчаи Ясеневойи Маскав дастгоҳи таркандае, ки зери мошин насб шуда буд, ба кор дароварда шуд. Дар натиҷа, Сарваров ҷароҳатҳои вазнин бардошта, дертар дар бемористон ҷон бохт. Дар бораи ин ҳодиса намояндаи расмии Кумитаи тафтишот Светлана Петренко хабар додааст.
Пештар бархе расонаҳо ва манобеи Кумитаи тафтишот хабар дода буданд, ки бар асари таркиш як марди номаълум захмӣ шудааст. Аммо баъдан мақомоти расмӣ марги Фанил Сарваров тасдиқ карданд.
Кумитаи тафтишотии Русия нисбат ба ин ҳодиса бо моддаҳои “қатл бо усули барои ҷомеа хатарнок” ва “гардиши ғайриқонунии маводи тарканда” парвандаи ҷиноӣ боз кардааст. Ба гуфтаи мақомот, чандин фарзияи эҳтимолии ҷиноят мавриди баррасӣ қарор доранд, аз ҷумла фарзияе, ки ин амал метавонад бо иштироки хадамоти махсуси Украина иртибот дошта бошад.
То кунун мақомоти Украина расман дар бораи марги генерал изҳори назар накардаанд.
Бар асоси иттилои расонаҳо, таркиш дар мошини Kia Sorento рух додааст, ки назди як бинои истиқоматӣ қарор дошт. Дар аввал гуфта мешуд, ки як марди 56-сола захмӣ шудааст ва бо ҳолати вазнин ба бемористон интиқол ёфтааст. Баъдан маълум шуд, ки ин нафар генерал Фанил Сарваров будааст.
Фанил Сарваров соли 1990 Омӯзишгоҳи олии фармондеҳии танкии Қазонро хатм карда, баъдан дар Академияи ҳарбии нерӯҳои зиреҳпӯши ба номи Малиновский ва Академияи ҳарбии Ситоди генералии Қувваҳои мусаллаҳи Русия таҳсил кардааст.
Ёдовар мешавем, ки қаблан низ дар Маскав чанд ҳолати ҳамла ба афсарони баландрутбаи низомӣ ба қайд гирифта шуда буд. Аз ҷумла, моҳи апрели соли ҷорӣ генерал-лейтенант Ярослав Москалик ва моҳи декабри соли 2024 генерал-лейтенант Игор Кириллов дар таркишҳо ба ҳалокат расида буданд.
