Бар асари задухӯрдҳои мусаллаҳона дар марзи муштараки Тоҷикистону Афғонистон теъдоде аз ду тараф кушта ва захмӣ шудаанд.
Бино ба иттилои манобеи Azda.tv аз ҷойи ҳодиса, дар марзҳои муштараки Тоҷикистону Афғонистон миёни сарбозони тоҷик ва чанд ҷангҷӯе, ки дар манотиқи назди сарҳадии Афғонистон ҳузур доранд, задухӯрди мусаллаҳона сурат гирифтааст.
Ба гуфтаи як афсари нерӯҳои марзбонии КДАМ-и Тоҷикистон, ки нахост номаш фош шавад, дар охирин рӯзи Рамазон чанд нафар аз ҷангҷӯёни тоҷики муқими Афғонистон вориди хоки Тоҷикистон шуда, сӯйи марзбонони тоҷик тир кушодаанд. Миёни ҷонибҳо задухӯрд сурат гирифт.
Дар ҳамин ҳол Тоҷиддин Суруш, рӯзноманигори афғон дар ҳисоби твиттераш хабар додааст, ки “21-уми апрели соли ҷорӣ як ҷангҷӯи Ансоруллоҳ ва 2 узви Толибон аз минтақаи Дарвози Бадахшон мехостанд вориди Тоҷикистон шаванд, аммо дар ин ҳолат бо марзбонони тоҷик рӯ ба рӯ шуда, як нафари онҳо захмӣ шудааст ва онҳо аз роҳи худ баргаштаанд”.
Як корбари дигари афғон бо номи Сайид Орфан Барзгар дар ҳисоби твиттераш аз ворид шудани як гурӯҳи ҷангҷӯён ба қаламрави Тоҷикистон хабар додааст.
Бино ба навиштаи ӯ “чанд рӯз пеш як гурӯҳи чаҳорнафарии террористҳои тоҷик аз вилояти Бадахшони Афғонистон вориди Тоҷикистон шудаанд. Рӯзҳои ахир марзбонони тоҷик ба таври ҷиддӣ дар ҷустуҷӯи ин афроданд”.
Дар ҳамин ҳол як манбаи дигари Azda.tv хабар дод, ки мақомот амалиёти ҷустуҷӯиро бар иловаи ВМКБ дар ноҳияҳои тобеи марказ ҳам оғоз кардаанд. Яку якбора зиёд шудани пулис ва сарбозон дар баъзе аз деҳаву кӯчаҳо сокинони кишварро нигарон кардааст.
Гуфта мешавад, раҳбари “Ҷамоати Ансоруллоҳ” Муҳаммад Шарипов маъруф ба Маҳдӣ Арсалон зодаи деҳаи Шербегиёни ҷамоати Сафедчашмаи ноҳияи Нуробод мебошад.
Бо вуҷуди он ки мақомоти Тоҷикистон ин ҳодисаро то ҳол расман шарҳ надодаанд, Azda.tv дар такя ба дигар манбаъҳо ҷузъиёти ҷадиди ин ҳодисаро пайгирӣ мекунад.
Бо пайдо шудани иттилои нав хабар такмил мешавад.
