Рӯзи 23-юми октябри соли ҷорӣ ба як корхонаи саноат ҳавонаврдии Туркия (Turkish Aerospace (TUSAŞ)) дар Анқара ҳамлаи мусаллаҳона сурат гирифт.
Мақомоти Туркия эълон карданд, ки дар пайи ин ҳамла 5 нафар кушта шуда ва 22 каси дигар хазмӣ шудааст.
Алӣ Ярлӣ Кая, вазири амнияти Туркия дар изҳороте ҳамларо “ҳамлаи террористӣ” хонд ва Ҳизби коргарони Курдистон “PKK”-ро масъули ин ҳодиса донист. Дар ин изҳорот гуфта шуда, ки ҳамла аз ҷониби як зан ва як марди мусаллаҳ анҷом шуда, ки ҳарду ҳам дар даргирӣ бо нерӯҳои зудамали ин кишвар кушта шуданд.
Ҳамзамон вазири амнияти Туркия мегӯяд, аз 5 нафари кушташуда 4 нафараш кормандони корхонаи мазкур буда, як нафараш ронандаи таксӣ будааст. Аммо ин масъул афзуд, ки дар байни захмиён 7 нафарашон нерӯҳои зудамали Турикя ҳастанд, ки ҳангоми даргирӣ бо муҳоҷимон захмӣ шуданд.
Бисёре аз кишварҳо, аз ҷумла Амрико, Британия, Олмон ин ҳамларо “террористӣ” дониста, маҳкум карданд. Вазорати корҳои хориҷии Тоҷикистон низ бо нашри изҳороте гуфтааст, ки “Тоҷикистон ин амали террористиро, ки бар асари он мардуми осоишта кушта ва захмӣ шудаанд, қотеъона маҳкум менамояд.”
Вазорати дифои Турки рӯзи панҷшанбе ба хабарнигорон гузориш дод, ки пас аз ҳамлаи мусаллаҳонаи дирӯз ба корхонаи саноати ҳавонавардии Анқара, шоми ҳамон рӯз ба мавзеъҳои гурӯҳи шибҳи низомии Ҳизби коргарони Курдистон дар шимоли Ироқу Сурия ҳамла кардааст.
Туркия эълом кард, ки “ҳамлаи талофиҷӯёна 47 ҳадафи мутааллиқ ба террористонро дар шимоли Ироқу Сурия пурра аз байн бурд.”
Ин вазорат дар гузоришаш мегӯяд, ки нерӯҳои давлатии Туркия аз аввали соли ҷорӣ то кунун 2 ҳазору 235 узви гурӯҳи низомии Ҳизби коргарони Курдисонтро аз по даровардааст. Ба гуфтаи ин ниҳод 1171 нафари онҳоро дар шимоли Ироқ ва 1064 нафари дигарро дар шимоли Сурия куштааст.
