Артиши Исроил аз рӯзи 21-уми ноябр ҳамлаҳои худро болои мардуми Ғазза шиддат бахшидааст. Давоми 24 соати гузашта 120 нафар кушта ва даҳҳо нафари дигар захмӣ шуданд.
Ҳамзамон Исроил субҳи имрӯз ҷануби шаҳри Бейрути Лубнонро ба шиддат бомборон кард. Гуфта мешавад, ҷангандаҳои Исроил минтақаи Аш-Шайёҳ дар ҷануби Бейрутро мавриди чандин ҳамла қарор доданд.
Ҳамзамон расонаҳои лубнонӣ хабар додаанд, ки Исроил бо паҳподҳо мардуми оддӣ ва дучархасаворону моторсеклетҳоро дар минтақаҳои гуногуни Бейрут ҳадаф қарор медиҳанд.
Хабаргузории “Ройтерз” аз мақомоти Италия хабар дод, ки 4 сарбози италяӣ дар натиҷаи бомборони Исроил ба пойгоҳи низомии Муҳофизони сули Созмони Милали Муттаҳид захмӣ шудаанд. Вале то кунун иллати ҳамлаи Исроил ба пойгоҳи Муҳофизони сулҳ расман шарҳ дода нашудааст.
Расонаҳои исроилӣ низ гузориш додаанд, ки аз оғози ҳамлаи низомӣ ба Лубнон 83 сарбозаш кушта шуда, 1018 сарбози дигараш захмӣ шудаанд.
Аз тарафи дигар, мувофиқи гузориши расонаҳо, нерӯҳои Исроил ба шаҳри Ноблус, қисмати шимолии Канораи Бохтарӣ ҳуҷум карда, бо фаластиниҳои таҳҷоӣ даргир шуданд. Ва низ гуфта мешавад, ки вазъ дар Қудс ҳам хуб нест. Зеро артиши Исроил барои ворид шудани намозгузорон ба Масҷид-ул-Ақсо монеъ шудаанд.
Дар чанд ҷабҳа шиддат бахшидани ҳамлаҳои Исроил дар ҳолест, ки рӯзи гузашта Додгоҳи ҷиноии байналмилалӣ дастури боздошти сарвазири Исроил Бинёмин Натанёҳу ва собиқ вазири дифои ин кишвар Юов Галантро содир кард. Додгоҳ ин ду нафарро “муҷримони ҷанг” эътироф карда, мегӯяд, ки онҳо “гуруснагиро ҳамчун силоҳ бар зидди мардуми Ғазза истфиода бурдаанд.” Дар пайи судури ин ҳукм ДҶБ аз кишварҳои дунё ва шарикон хост, ки ҳукмро иҷро кунанд.
