25.9 C
Dushanbe

Ҳамлами бесобиқаи ҲАМОС ба Исроил ва вокуниши ҷомеаи ҷаҳонӣ

Даргириҳои мусаллаҳона байни нерӯҳои ҳаракати муқовимати исломии Фаластин (ҲАМОС) ва артиши Исроил ду рӯз боз идома дорад.

Шабакаи телевизиони 13-и Исроил дар гузориши ахираш гуфта, ки дар пайи ин даргириҳо то кунун 600 нафар аз шарвандони Исроил кушта шуда, шумори захмиён то 2 ҳазор нафар расидааст.

Дар баробари ин, артиши Исроил бо ҳамлаҳои ҳавоӣ ва заминии худ шаҳри Ғаззаро бомборон дорад, ки дар натиҷа даҳҳо хонаҳо хароб шуда, ҳазорҳо нафар хонаҳои худро тарк карда, дар мактабҳо ва маконҳои дигар маскун шудаанд.

Вазорати тандурустии Фаластин дар гузорише субҳи рӯзи якшанбе гуфт, ки шумори ҳалокшудагон дар пайи ин даргирӣ ба 320 нафар расида, шумори захмиён аз марзи 2 ҳазор ҳам гузашт. Инчунин то кунун 23 ҳазор аз сокинони Ғазза овора шудаанд.

Ҷабҳаи Қассом – ҷаноҳи низомии ҲАМОС субҳи рӯзи шанбе дар изҳороте гуфт, ки ҳазорҳо мушак ба шаҳрҳои Исроил партоб карда, даҳҳо нафар аз шаҳракнишинони исроилиро асир гирифтаанд. ҲАМОС мегӯяд, ҳадаф аз ин амалиёти бесобиқа бар зидди давлати Исроил посух ба таҷовуз ва зулми шаҳракнишинони исроилӣ алайҳи фаластиниён ва муқаддасоти мусалмонон ва инчунин бозгардонидани заминҳои ғасбшуда аз ҷониби ин кишвар аст.

Аммо Исроил ва кишварҳои ҳампаймонаш ин амалиётро “террористӣ” унвон карда, ҲАМОС-ро муқассири ин ҷанг медонанд. Ҷо Байден, раисҷумҳури Амрико дар вокуниш ба ин даргириҳо гуфт, ки Вошингтон аз Исроил ҳимоя мекунад ва ҳамеша дар паҳлуи мардуми он меистад.

Ҳамзамон Бритониё ва Олмон низ амалиёти ҲАМОС-ро “ҳавлнок” ва “шукакунанда” номида, эълон карданд, ки дар ин ҳодиса аз Исроил ҳимоят мекунанд.

Дар баробари ин, кишварҳои арабӣ, аз ҷумла Вазорати хориҷаи Қатар бо изҳори нигаронӣ ва талаби хештандорӣ ва ҳифзи оромиши ду тараф, ҷониби Исроилро сабабгори аслии он номидааст. “Исроил бо поймол кардани ҳамешагии ҳуқуқи фаластиниҳо ва ҳамлаҳои батакрор бо ҳимояти пулис ба Масҷиди Ақсо, сабабгор ва масъули ягонаи ҳодисаи имрӯза аст.“, омадааст дар изҳороти Вазорати хориҷаи Қатар.

Ҳамзамон кишварҳои Урдун, Миср, Ироқ, Лубнон ва ғайра ин даргириро сабаби “истибдоди Исроил дар баробари мардуми Фаластин” унвон карда, тарафҳоро ба даст бардоштан аз куштори шаҳрвандони оддӣ ва мардуми бесилоҳ ва инчунин ба сулҳ ва гуфтугӯи фарвӣ даъват кардаанд.

Дар ҳамин ҳол Ҳизбуллоҳи Лубнон субҳи рӯзи якшанбе хабар дод, ки дар ҳимоят аз ҳамлаҳои ҲАМОС ба се маркази низомии Исроил дар қисмати шимолии ин кишвар ҳамла кардааст. Гуфта мешавад, Исроил низ дар посух мавзеъҳои низомии Ҳизбуллоҳро бо паҳпод ва тупхонаҳо маврид ҳамла қарор додааст.

Ба гуфтаи бархе коршиносон, эҳтимол меравад доманаи ҷанг дар ин минтақа васеътар шавад. Чун Исроил аз соли 1973 ин бори аввал аст, ки дар кишвараш вазъияти ҷангӣ эълон кардааст. Ва ҳамчунин ин бор ҷонибдории аксари кишварҳои арабӣ аз амалиёти ҲАМОС низ дида мешавад, ки ин аз ҳодисаҳои қаблӣ фарқ дорад.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Ихроҷи 3400 муҳоҷир дар 6 моҳ

Дар шаш моҳи аввали соли ҷорӣ наздик ба сениюм ҳазор муҳоҷири тоҷикистониро мақомоти Русия ихроҷ кардаанд.

Оғози гармои шадид дар Тоҷикистон ва фармони Раҳмон ба мардум

Шурӯъ аз имрӯз дамои ҳаво дар бархе минтақаҳои Тоҷикистон ба таври камсобиқа гармтар шуда, ва он мақомотро нигарон кардааст.

Боздошти “РАЛИК” баъд аз нашри наворҳои баҳсбарангез

Рэпсарои ҷавони тоҷик Рамазон Муродов, ки бо тахалуси "РАЛИК" маъруф аст, рӮзи 23-уми июл пас аз интишори чанд навори интиқодӣ боздошт шуд.

Ҳалокати 5 узви як хонавода дар Суғд

Бар асари як садамаи нақлиётӣ дар вилояти Суғд 5 узви як хонавода кушта ва ду каси дигар захмӣ шудааст.