Қонунгузорони Ҷумҳурихоҳ дар Сенат пешниҳод карданд, ки Иёлоти Муттаҳида аз Созмони Милали Муттаҳид (СММ) хориҷ шавад.
Тибқи гузориши Fox News, ин лоиҳа барои қатъи узвияти ИМА дар СММ ва дигар ниҳодҳои он, инчунин барои қатъи маблағгузории ин созмон ва муассисаҳои вобастаи он аст.
Гуфта мешавад, мақсади пешниҳодкунандагони ин тарҳ пуштибонӣ аз сиёсати президенти ин кишвар Доналд Трамп дар мавриди тақвияти иқтисоди Амрико ва даст кашидан аз кумакҳои молӣ ба хориҷ мебошад. Онҳо бар ин боварнд, ки СММ манфиатҳои ИМА-ро ба назар намегирад.
Намояндаи ИМА Чип Рой, изҳор доштааст, ки ин лоиҳа дар палатаи поёнии парламент ба муҳокима гузошта хоҳад шуд, зеро ба гуфтаи ӯ, СММ пули андозсупорандагони амрикоиро барои манфиатҳои дигар кишварҳо ва ҳукуматҳои хориҷӣ истифода мекунад.
Сенатори Ҷумҳурихоҳ Майк Ли, низ таъкид кардааст, ки СММ имрӯз як платформаи зидди Амрико ва ҳомии душманони кишвар шудааст.
Дар ҳамин ҳол, маълумоти Шӯрои равобити хориҷии ин кишвар нишон медиҳад, ки ИМА дар соли 2022 барои фаъолияти СММ беш аз 18 миллиард доллар маблағгузорӣ кардааст, ки ин тақрибан сеяки тамоми буҷети Созмони Милали Муттаҳидро ташкил медиҳад.
Fox News қайд навишта, ки Трамп дар давраи аввали худ кӯшиш кард, ки маблағгузории гурӯҳҳои СММ-ро кам кунад ва дар давраи дуюмаш низ ин корро кард.
Пештар аз ин, рӯзи 4-уми феврал раисҷумҳури Амрико Доналд Трамп фармонеро имзо кард, ки ширкати Вашингтонро дар фаъолиятҳои СММ арзёбӣ мекунад. Вай ҳамчунин дар моҳи феврал фармонеро дар бораи хуруҷи Амрико аз Шӯрои Ҳуқуқи Башари СММ ва коҳиши маблағгузорӣ ба UNRWA “Ожонси Созмони Милали Муттаҳид оид ба кумак ба гурезаҳои фаластинӣ ва фаъолияти онҳо” имзо кард.
