Бо ворид шудани рӯзи панҷуми ҷанги муштараки Амрико ва Исроил алайҳи Эрон ҳамчнон ҳуҷумҳо аз ҳарду тарафи ҷанг раду бадал мешаванд.
Бино ба гузориши расона, ҳамлаҳои Амрико ва Исроил субҳи 4-уми март ба чандин шаҳри Эрон идома доранд. Артиши Исроил эълом кард, ки даҳҳо маркази фармондеҳии низомӣ, амнияти дохилӣ ва раҳбарияти нерӯҳои Басиҷи Эронро мавриди ҳамла қарор додааст.
Ҳамчунин имрӯз, Йисроэл Катс, вазири дифои Исроил таҳдид карда, ки ҳар фармондеҳе, ки аз ҷониби низоми Эрон таъйин мешавад, ҳадафи мустақими мо қарор хоҳад гирифт. Ӯ мегӯяд, ҳадаф қарор додани раҳбарони Эрон бахше аз аҳдофи амалиётии Исроил аст.
Раиси Ситоди муштараки Нерӯҳои мусаллаҳи Амрико Дон Кейн имрӯз дар ҳузури хабарнигорон гуфт, ки Амрико амалиёташро ба умқи Эрон ташдид мебахшем. Ӯ гуфт, “то кунун 2 ҳазор ҳуҷум анҷом додем ва 20 киштии эрониро мунҳадим кардем ва акнун ҳуҷумҳои баъдӣ болои низоми мушакии Эрон нигаронида мешавад”.
Ин мақоми низомии Амрико афзуд, ки дар ҳамлаҳои худ ба Эрон зерсохторҳо ва маконҳои умумиро ҳадаф қарор намедиҳанд. Аммо дар робита ба ҳамлаи нерӯҳои амрикоӣ ба мактаби духтарона дар Эрон, ки онҷо низомие набуд, гуфт, ки онро “таҳқиқ мекунем”.
Дар ҳамин ҳол нерӯҳои эронӣ низ бо мавҷҳои пайдарпайи мушакҳо нуқтаҳои гуногуни шаҳри Телавив ва шимоли Исроилро ҳадаф қарор доданд.
Сипоҳи посдорони Инқилоби исломии Эрон эълом кард, ки Тангаи Ҳурмузро, ки дар даромадгоҳи Халиҷи Форс ҷойгир аст ва барои тиҷорати ҷаҳонии нефт аҳамияти ҳаётӣ дорад, бастааст ва бар он тасаллути комил дорад.
Ҳамчунин Эрон гузриш дод, ки дар мавҷи 17-уми ҳамлаҳо беш аз 40 мушак ба ҳадафҳои амрикоӣ ва исроилӣ дар минтақа ҳамла кардааст.
Ҳамзамон Вазорати корҳои хориҷии Имороти Муттаҳидаи Арабӣ эълон кард, ки Эрон ба сӯи ин кишвар беш аз ҳазор мушаку паҳпод фиристодааст, ки аксари кулли онҳоро раҳгирӣ кардаанд.
Дар байни ин даргириҳо мақомоти лубнонӣ низ аз ҳамлаҳои Исроил ба ин кишвар гузориш медиҳанд. Гуфта мешавад, Исроил дар Лубнон чандин ҳамлаи ҳавоӣ, аз ҷумла дар ҷануб ва шарқи ин кишвар анҷом додааст. Артиши Исроил аз сокинони манотиқи ҷануби Лубнон хостааст, ки қисмати ҷануби рӯди Литониро тарк карда, ба шимоли он кӯч банданд.
Расонаҳои лубнонӣ аз мақомоти амниятии ин кишвар навиштанд, ки нерӯҳои исроилӣ вориди хоки Лубнон шуда, ба чанд деҳаи марзӣ ҳамла карданд ва то ду километрии он дарун даромадаанд. Аммо задухӯрде бо нерӯҳои Ҳизбуллоҳ сурат нагирифтааст.
