Александр Бастрикин, ки ҳамчун як мақомдори муҳоҷирбадбин ном баровардааст, пешниҳод дорад, ки рӯйхати асосҳои бекор намудани шаҳрвандии Русия барои зодагони кишварҳои хориҷӣ, васеъ карда шавад.
Раиси Кумитаи тафтишотии Русия Александр Бастрикин дар ҷаласаи ҷамъбастии ниҳоди зери роҳбарияш гуфта, ки ба ин рӯйхат содир намудани ҳар гуна ҷинояти вазнин ё махсусан вазнини қасдан содиршуда, дохил карда шавад.
Ба гуфтаи ӯ, шахсоне, ки шаҳрвандиро гирифтаанд ва чунин ҷиноят содир мекунанд, “пайванди ҳуқуқию сиёсиро бо давлат аз даст медиҳанд”. Ӯ ҳамчунин таъкид карда, ки нигоҳ доштани шаҳрвандӣ дар чунин ҳолатҳо метавонад ба эътимоди ҷомеа ба ниҳоди шаҳрвандидиҳӣ таъсир расонад.
Бастрикин ҳамчунин иддао карда, ки дар соли 2025 шумораи ҷиноятҳои содиркардаи муҳоҷирон 7 дарсад афзоиш ёфта, ба 41 ҳазору 103 ҳолат расидааст. Ба гуфтаи ӯ, раванди муҳоҷират бояд таҳти назорати қатъии давлат қарор гирад, то манфиатҳои миллӣ ва ҳуқуқи шаҳрвандон ҳифз карда шаванд.
Бояд гуфт ҷиноятҳои содиркардаи муҳоҷирон дар баробари тамоми ҷиноятҳое, ки дар Русия содир шудаанд, ночиз буда танҳо соли 2024 дар тамоми қаламрави ин кишвар беш аз 1,77 миллион ҷиноят содир шуда будааст.
Пешниҳоди ин мақомдори рус ҳам дар ҳолест, ки раиси Думаи давлатӣ Вячеслав Володин гуфта буд, ки соли 2025 шаҳрвандии зиёда аз 1 ҳазору 300 нафар дар Русия бекор карда шуда буд.
Дар Русия дар баробари васеъ кардани асосҳои бекор кардани шаҳрвандӣ, мақомдорон талош доранд гирифтани шаҳрвандӣ, иқома ва иқомаи доимро барои зодагони кишварҳои хориҷӣ сахттар кунанд.
Ҳукумат лоиҳаи қонунеро пешниҳод кардааст, ки мавҷудияти ҳар гуна доғи судии бекорнашуда ё нобардошташуда сабаб барои рад кардани дархост гардад ва ҳамчунин пешниҳод шудааст, ки ҳангоми пешниҳоди ариза барои гирифтани иҷозатномаи иқомати муваққатӣ ё доимӣ, шаҳрвандони хориҷӣ бояд маълумотнома дар бораи мавҷудият ё набудани доғи судӣ пешниҳод намоянд. Ин талабот ба кӯдакони то 14-сола дахл надорад.
Барои шаҳрвандони Украина меъёри алоҳида пешбинӣ шуда, дар давоми ду сол пас аз эътибор пайдо кардани қонун, онҳо аз пешниҳоди маълумот дар бораи доғи судӣ озод мешаванд.
