Парвози ҳавопаймоҳо дар Фурӯдгоҳи байналмилалии Душанбе ба хотири номусоид будани обу ҳаво муваққатан боздошта шуданд.
Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон хабар медиҳад, ки аз 22 то 24-уми декабр пас аз қатъ шудани боришот ва соф шудани ҳаво дар шаҳри Душанбе, ноҳияҳои тобеи ҷумҳурӣ, инчунин дар вилоятҳои Суғд ва Хатлон туман ва яхбандон шабнам ба вуҷуд меояд.
Ба иттилои ин ниҳод, дар соатҳои шабона ва субҳгоҳӣ коҳиши дидрасӣ дар натиҷаи туман то 100–300 метр пешбинӣ мешавад. Ҳамчунин эҳтимоли ба вуҷуд омадани яхбандӣ дар роҳҳо, пиёдароҳаҳо, хатҳои интиқоли барқ, дарахтон вуҷуд дорад.
Дар ҳамин ҳол, дар пайи фаромадани тумани сахт дар шаҳри Душанбе парвозҳо аз фурӯдгоҳи пойтахт муваққатан қатъ шудаанд. Аз шоми 22-юми декабр шаҳри Душанбе зери туман қарор дорад ва ин вазъ субҳи 23-юми декабр низ идома ёфтааст.
Бар асоси маълумоти чадвали парвозҳои фурӯдгоҳи Душанбе, ҳамаи парвозҳо, аз ҷумла ба самтҳои Маскав, Дубай, Екатеринбург ва парвозҳои баргашт, аз соати 12-и шаби 22 ба 23-юми декабр боздошта шудаанд. Ҳамчунин парвоз ба шаҳри Хоруғ, ки тибқи ҷадвал бояд имрӯз соати 12:20 анҷом мешуд, лағв шудааст.
Мақомот ҳушдор медиҳанд, ки чунин шароити обу ҳаво метавонад боиси душвор шудани ҳаракати нақлиёт, афзоиши хатари садамаҳои роҳу нақлиёт ва халалдор шудани фаъолияти нақлиёти ҳавоӣ гардад. То ҳол маълум нест, ки парвозҳои ба таъхир афтода кай аз нав барқарор мешаванд.
Дар робита ба ин, Агентии обуҳавошиносӣ ба ронандагон тавсия медиҳад, ки суръати ҳаракатро коҳиш дода, фосилаи байни худравҳоро зиёд кунанд ва чароғҳои наздикро истифода баранд. Ба пиёдагардон низ тавсия шудааст, ки ҳангоми ҳаракат дар ҷойҳои лағжанда эҳтиёткор бошанд. Ба сохторҳои масъул бошад, омодабошӣ ва таъмини бехатарии ҳаракат дар роҳҳо ва фаъолияти мунтазами инфрасохтор супориш дода шудааст.
