Бар асоси як тавофуқе байни мақомҳои дахлдори Тоҷикистону Эрон парвозҳои мустақим ба баъзе шаҳрҳои ин ду кишвар роҳандозӣ мешавад.
Рӯзи 11-уми ноябри соли 2025 дар шаҳри Душанбе мулоқоти директори Агентии авиатсияи граждании назди Ҳукумати Тоҷикистон Ҳабибулло Темур Назарзода бо президенти Маъмурияти авиатсияи граждании Ҷумҳурии Исломии Эрон Ҳусейн Пурфарзона бо дархости ҷониби Тоҷикистон баргузор гардид.
Ҷонибҳо дар ин вохӯрӣ масъалаҳои густариши ҳамкориҳои дуҷониба дар соҳаи авиатсияи гражданӣ ва тақвияти робитаҳои нақлиётӣ байни ду кишварро баррасӣ намуданд.
Аз ҷумла, ҷонибҳо дар бораи афзоиши шумори парвозҳо ва ифтитоҳи хатсайрҳои нави ҳавоӣ дар самтҳои Киш–Душанбе, Киш–Хуҷанд ва Шероз–Душанбе тавофуқ карданд.
Ҳабибулло Назарзода таъкид кард, ки Тоҷикистон дар доираи сиёсати “Осмони кушод”, ки мувофиқи қарори Ҳукумат амалӣ мегардад, барои ширкатҳои байналмилалии ҳавопаймоӣ 40 дарсад тахфиф дар хидматрасонии фурӯдгоҳҳо пешбинӣ кардааст. Ба гуфтаи ӯ, ин иқдом бо ҳадафи ҷалби сармоя ва рушди ҳамкориҳои авиатсионӣ роҳандозӣ шудааст.
Дар мулоқот ҳамчунин масъалаи такмили ихтисоси мутахассисон ва ташкил кардани курсҳои омӯзишӣ мавриди баррасӣ қарор гирифт.
Айни замон миёни ду кишвар парвозҳои мунтазам аз ҷониби “Сомон Эйр” ва “Вориш Эйрлайнз” анҷом дода мешаванд.
Тибқи иттилои Агентӣ, аз 19-уми ноябри соли 2025 ширкати “Раймонд Эйрлайнз” парвозҳои мунтазам дар хатсайри Машҳад – Душанбе – Машҳад ҳафтае ду маротиба оғоз мекунад. Ҳамзамон аз 28-уми ноябр парвозҳои чартерии “Киш Эйрлайнз” дар самти Киш – Душанбе – Киш ба роҳ монда мешаванд.
Ҷонибҳо изҳор доштанд, ки ин иқдомҳо ба рушди минбаъдаи ҳамкориҳои иқтисодӣ, сайёҳӣ ва фарҳангии Тоҷикистону Эрон мусоидат хоҳанд кард.
