Баҳси сохтмони мактаб дар ноҳияи Дӯстии вилояти Хатлон то рафт гармтар мешавад

Аксҳо: Саҳифаи Фирӯз Маҳмадулло, Фейсбук

“Авангард” - як гурӯҳи ҷамъиятие, ки то ба имрӯз дар ҳеч вазорату ниҳоди давлатие дар қаламрави Тоҷикистон ба қайд гирифта нашудааст, дар саҳифаи фейсбукаш навишта буд, ки ин гурӯҳ дар ноҳияи Дӯстии вилояти Хатлон юарои хонандагон мактаб месозад, аммо масъулини ноҳия чунин иқдомеро аз ҷониби ин гурӯҳ рад мекунанд.

Гуфта мешавад, ки гурӯҳи “Авангард” аз сӯйи Вазорати корҳои дохилии Тоҷикистон пуштибонӣ мешавад, аммо Вазорат онро рад мекунад, дар ҳоле, ки намояндагони ин гурӯҳ борҳо бо Рамазон Раҳмизода вохӯри анҷом додаанд, ҳамчунин аз натиҷаҳои фаъолияташон ба ӯ ҳисобот низ медиҳанд.

Хабари мактаб сохтани ин гурӯҳро шуъбаи маорифи ноҳияи Дӯстӣ дар суҳбат бо “Азия Плюс” рад карданд ва гуфтаанд, ки мактаб бо маблағгузории Кумитаи падару модарони деҳаҳое, ки мактаб дар он ҷо ҷойгир асту фарзандони онҳо бояд дар ин мактаб таҳсил кунанд, сохта мешавад.

Маҳмадшариф Камолов мудири маорифи ноҳияи Дӯстӣ гуфтааст, ки бинои мактаби рақами 23-и деҳаи Нури Вахши ноҳияи Дӯстӣ аз солҳои 50-уми асри гузашта бозмонда ва хеле фарсуда шудааст. “Кумитаи падару модарон бо саҳми худ ва маблағҳои ҷамъовардаашон мехоҳанд ин мактабро созанд”.

Ҳамчунин Абдурасул Нурқобилов, директори мактаби мазкур гуфтааст, ин мактаб бо маблағҳои Кумитаи падару модарон ва ҳашари сокинон ҷараён дорад, дар мавриди саҳмгузории гурӯҳи “Авангард” дар бунёди ин мактаб изҳори бехабарӣ кардааст.

Нурқобилов гуфтааст:  

"гурӯҳи “Авангард” танҳо омаданд дар як маҷлиси Кумитаи падару модарон ширкат карданду ба мардум ташаккур гуфтанд, ки ба чунин корҳо даст мезананд. “Ин мактабро Кумитаи падару модарон месозад. Гурӯҳи “Авангард” ба сохтмони ин мактаб ягон рабт надорад. Онҳо чӣ доранд, ки дар сохтани мактаб иштирок кунанд. Ин хел гап нест, ки гурӯҳи “Авангард” мактаб месохта бошад”.

Фирӯз Маҳмадулло дар суҳбати телефонӣ ба “Азия-Плюс” гуфтааст: гурӯҳи ҷавонони "Авангард" муштаракан бо сокинону фаъолони деҳаи Нури Вахши ноҳияи Дӯстии вилояти Хатлон бо роҳи ҳашари дастаҷамона бинои нави муассисаи таҳсилоти миёнаи умумӣ сохта ба истифода медиҳанд.

Дар идома гуфтааст:

“Мо гурӯҳи ҷавонони "Авангард" яке аз мо тахта, дигаре чанд линча семент, як нафар арматура ё ду мошин шағал ёрдам карда истоданд. Инчунин он ёру дустони мо, ки соҳибкоранд, онҳоро низ мо бо ин кор ҷалб кардем. Кӯмак карда истоданд”.

Вале Абдурасул Нурқобилов гуфтааст, то  ҳол ҳеч гуна саҳмгузории гурӯҳи “Авангард” дар сохтани ин мактаб матраҳ нест ва онҳо то ҳозир ҳеч саҳме на саҳми молӣ ва на саҳми масолеҳи сохтмонӣ гузоштаанд.

Мактаби шумори 23-и ноҳияи Дӯстӣ аз ҳисоби Кумитаи падару модарони деҳаҳои Нури Вахш ва Навободи ҷамоати Нури Вахши ноҳия барои 225 хонада дар як баст сохта мешавад, ки иборат аз 9 синфхона, роҳрав, як утоқи маъмурӣ ва як маҷлисгоҳ хоҳад буд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.