Банкоматҳои Бонки Эсхата се рӯз боз маблағ надоранд. Сокинон, хусусан донишҷӯён аз он изҳори норозигӣ доранд, ки се рӯз мешавад наметавонанд маблағе дарёфт кунанд. Ба қавли сокинон, тамоми нуқтаҳои ин бонкро дар шаҳр гаштаанд, вале яке аз онҳо ҳам фаъол нест.
Корбарон аз шаҳри Душанбе аз бонкоматҳои назди бонки марказии Эсхата, ки дар Хиёбони Рӯдакии шаҳри Душанбе ҷойгир аст ва 24 соат кор мекунад, бо ирсоли наворе ба “Аздо тв” шикоят карданд, ки аз рӯзи ваъдаашон як рӯз гузаштааст, ҳатто дар бонкоматҳои марказии ин бонк маблағ нест. Ва онҳо намедонанд аз куҷо маблағҳояшонро бигиранд.
Дар рӯи банкоматҳои Бонки Эсхата эълон навишта шуда, ки “Бинобар сабаби гузариш ба протсесинги нав бонкоматҳо аз санаи 29.03.2021 соати 12:00 муваққатан кор намекунанд”.
Агарчи дар эълон гуфта мешавад, ки аз 31 март хидматрасонӣ марҳила ба марҳила барқарор мешаванд, вале корбарон рӯзи 1 апрел гуфтанд, тамоми шаҳрро гаштанд, дар ҳеч яке аз бонкоматҳои ин бонк малғае вуҷуд надорад.
Назари масъулини Бонки Эсхата дар ин маврид то ҳол дастрас нест.
Бори аввал нест, ки банкоматҳои кишвар бемаблағ мемонанд ва сокинон сарсону овора мешаванд. Моҳи декабри соли гузашта низ бонкоматҳои Амонатбонк дар тамоми вилояти Хатлон чанд рӯз маблағи нақд надоштанд, ки ин нигаронии аҳолӣ, ба хусус бознишастагонро ба бор оварда буд.
